చీఫ్ సెలెక్టర్ రేసులో జడేజా? బీసీసీఐ పోస్ట్‌కు స్టార్ ఆల్‌రౌండర్ రిప్లై

టీమిండియా చీఫ్ సెలెక్టర్ పదవి ఖాళీ కావడంతో బీసీసీఐ కొత్త దరఖాస్తులను ఆహ్వానించింది. ఈ ప్రకటనపై స్టార్ ఆల్‌రౌండర్ రవీంద్ర జడేజా సరదాగా స్పందించాడు. బీసీసీఐ అధికారిక ఎక్స్ ఖాతాలో చేసిన పోస్టుకు “అప్లై చేయడానికి ప్రాసెస్ ఏంటి?” అంటూ కామెంట్ చేశాడు. జడేజా వ్యాఖ్యను సరదాగానే చేసినప్పటికీ, చీఫ్ సెలెక్టర్ పదవికి కొత్త వ్యక్తి ఎవరనే చర్చ జరుగుతున్న సమయంలో ఇది క్రికెట్ అభిమానుల దృష్టిని ఆకర్షించింది.

అయితే జడేజా నిజంగా ఈ పదవికి దరఖాస్తు చేయడం ప్రస్తుత నిబంధనల ప్రకారం సాధ్యం కాదు. బీసీసీఐ నిబంధనల ప్రకారం సెలెక్షన్ కమిటీ సభ్యుడిగా దరఖాస్తు చేసే వ్యక్తి కనీసం ఐదేళ్ల క్రితం క్రికెట్‌కు రిటైర్ అయి ఉండాలి. జడేజా 2024లో టీ20 అంతర్జాతీయ క్రికెట్‌కు మాత్రమే రిటైర్ కాగా, టెస్టులు, వన్డేల్లో కొనసాగుతున్నాడు. మరోవైపు, 2023లో చీఫ్ సెలెక్టర్‌గా బాధ్యతలు చేపట్టిన అజిత్ అగార్కర్ పదవీకాలం అక్టోబర్ 4న ముగిసింది. ఆయన హయాంలో భారత్ 2024, 2026 టీ20 ప్రపంచకప్‌లు, 2025 ఛాంపియన్స్ ట్రోఫీ గెలవడంతో పాటు 2023 వన్డే ప్రపంచకప్ ఫైనల్‌కు చేరింది. బీసీసీఐ అగార్కర్ సేవలను ప్రశంసించగా, హెడ్ కోచ్ గౌతమ్ గంభీర్ కూడా ఆయనకు అభినందనలు తెలిపాడు.