తల్లికాబోతున్న బిగ్‌బాస్ బ్యూటీ ప్రేరణ కంభం.. రష్మిక ‘రణబాలి’ స్టైల్‌లో గ్రాండ్‌గా సీమంతం

బిగ్‌బాస్ తెలుగు సీజన్ 8 కంటెస్టెంట్, టీవీ నటి ప్రేరణ కంభం త్వరలో తల్లి కాబోతోంది. ఇటీవలే తన ప్రెగ్నెన్సీ విషయాన్ని సోషల్ మీడియా ద్వారా అభిమానులతో పంచుకున్న ఆమె, భర్తతో కలిసి బేబీ బంప్ చూపిస్తూ ఓ వీడియోను పోస్ట్ చేసింది. ఈ శుభవార్త తెలుసుకున్న బిగ్‌బాస్ కంటెస్టెంట్లు, బుల్లితెర ప్రముఖులు, అభిమానులు ప్రేరణ దంపతులకు శుభాకాంక్షలు తెలిపారు. తాజాగా ప్రేరణ సీమంతం వేడుక కుటుంబ సభ్యులు, స్నేహితులు, సన్నిహితుల సమక్షంలో ఘనంగా జరిగింది. ఈ వేడుకలో పాల్గొన్న వారంతా త్వరలో జన్మించనున్న బిడ్డను ఆశీర్వదిస్తూ దంపతులకు అభినందనలు తెలిపారు.

సీమంతం వేడుకకు సంబంధించిన వీడియోను ప్రేరణ సోషల్ మీడియాలో షేర్ చేసింది. రష్మిక మందన్నా నటించిన ‘రణబాలి’ సినిమాలోని జయమ్మ పాత్రకు సంబంధించిన ‘ఏందయ్యా సామీ’ పాటను ఈ వీడియోకు జత చేయడంతో అది నెటిజన్ల దృష్టిని ఆకర్షిస్తోంది. తమ కుటుంబ వారసుడి రాక కోసం నిర్వహిస్తున్న ఈ వేడుక ప్రేమ, ఆశీర్వాదాలతో నిండిపోయిందనే భావన వచ్చేలా ప్రేరణ క్యాప్షన్ ఇచ్చింది. కన్నడ చిత్ర పరిశ్రమకు చెందిన ప్రేరణకు రష్మిక మందన్నాతో మంచి స్నేహబంధం ఉంది. ‘కృష్ణ ముకుంద మురారి’ సీరియల్‌తో తెలుగు ప్రేక్షకులకు చేరువైన ప్రేరణ, ఆ తర్వాత బిగ్‌బాస్ తెలుగు సీజన్ 8లో పాల్గొని టాప్-4లో నిలిచింది.