మిల్లర్లతో కుమ్మక్కైన అధికారులా? సీఎంఆర్‌ అక్రమాలపై సీఐడీ దర్యాప్తు ముమ్మరం

తెలంగాణలో సంచలనం సృష్టించిన రూ.6 వేల కోట్ల కస్టమ్‌ మిల్డ్‌ రైస్‌ (సీఎంఆర్‌) అక్రమాల వ్యవహారంలో పౌరసరఫరాల శాఖతోపాటు ఎన్‌ఫోర్స్‌మెంట్‌ టాస్క్‌ఫోర్స్‌ (ఈటీఎఫ్‌)లోని కొందరు అధికారుల పాత్రపై అనుమానాలు వ్యక్తమవుతున్నాయి. బియ్యం పక్కదారి పట్టకుండా అడ్డుకోవాల్సిన బాధ్యత ఉన్న సిబ్బందిలో కొందరే రైస్‌మిల్లర్లతో కుమ్మక్కైనట్లు విజిలెన్స్‌ అండ్‌ ఎన్‌ఫోర్స్‌మెంట్‌, సీఐడీ దర్యాప్తుల్లో పలు అంశాలు వెలుగులోకి వస్తున్నాయి. రాష్ట్రవ్యాప్తంగా మిల్లర్లు ప్రభుత్వానికి సుమారు రూ.6 వేల కోట్ల విలువైన సీఎంఆర్‌ బియ్యాన్ని తిరిగి ఇవ్వాల్సి ఉండగా, ఇందులో దాదాపు రూ.4 వేల కోట్లు 300 మంది బడా మిల్లర్లకు సంబంధించినవిగా అంచనా వేస్తున్నారు. మూడు జిల్లాల్లోనే భారీగా బకాయిలు ఉన్నట్లు గుర్తించారు. ఉత్తర తెలంగాణలోని ఓ జిల్లాలో రూ.670 కోట్లు, దక్షిణ తెలంగాణలోని మరో జిల్లాలో రూ.600 కోట్లు, సమీపంలోని ఇంకో జిల్లాలో రూ.300 కోట్ల బకాయిలున్నట్లు సమాచారం. డిఫాల్టర్లుగా మారిన మిల్లర్లు బినామీ పేర్లతో కొత్త మిల్లులు ఏర్పాటు చేసినా ఈటీఎఫ్‌ అధికారులు పట్టించుకోలేదనే ఆరోపణలపైనా విచారణ జరుగుతోంది. ఈ వ్యవహారంలో ఒక అధికారిని ఇటీవల విధుల నుంచి తొలగించగా, మరో అధికారిని సీఐడీ అరెస్టు చేసింది.

నిర్మల్‌ జిల్లాలో నాలుగేళ్లలో 24 కొత్త రైస్‌మిల్లులకు అనుమతులు ఇవ్వడం, చిన్నపాటి షెడ్లలో ఉన్న మిల్లులకు కూడా సీఎంఆర్‌ కేటాయించడంతో బియ్యాన్ని ఇతర ప్రాంతాలకు తరలించి విక్రయించినట్లు వచ్చిన ఆరోపణలను దర్యాప్తు సంస్థలు పరిశీలిస్తున్నాయి. ములుగు జిల్లాలో ఓ మిల్లుకు మూడేళ్ల క్రితమే సాల్టెక్స్‌ యంత్రం ఉన్నట్లు ఈటీఎఫ్‌ అధికారి ధ్రువీకరించినా, ఇటీవల తనిఖీల సమయంలో ఆ యంత్రాన్ని అప్పుడే బిగిస్తున్నట్లు గుర్తించినట్లు సమాచారం. మిల్లర్లతో లావాదేవీలు, ఒప్పందాల కోసం కొందరు అధికారులు కోదాడ, ఎల్‌బీనగర్‌లో ప్రైవేటు కార్యాలయాలు నిర్వహించినట్లు కూడా ఆరోపణలున్నాయి. గత ఆగస్టులో పీడీఎస్‌ బియ్యం తరలిస్తున్న పది లారీలను పట్టుకున్నప్పటికీ, ఒక లారీపైనే కేసు నమోదు చేసి మిగిలిన వాటిని వదిలేయడంపై విచారణ కొనసాగుతోంది. మరోవైపు, రైతుల బోనస్‌ సొమ్ములో రూ.3.5 కోట్లు దుర్వినియోగం చేశారనే ఆరోపణలున్న వ్యాపారి ప్రారంభించిన రైస్‌మిల్లు ప్రారంభోత్సవానికి ఈటీఎఫ్‌ కీలకాధికారి హాజరైన అంశంపైనా అధికారులు ఆరా తీస్తున్నారు. రూ.20 కోట్లకుపైగా సీఎంఆర్‌ బకాయిలున్న మిల్లుకు సంబంధించిన నిర్వాహకుడి నుంచి ఓ కీలకాధికారికి పెద్ద మొత్తంలో నగదు అందిందనే ఆరోపణలు, ఆ వ్యాపారి ప్రైవేటు ఆసుపత్రి ప్రారంభం వెనుక సీఎంఆర్‌ నిధులున్నాయనే అనుమానాలపైనా దర్యాప్తు చేస్తున్నారు. ఈ ఆరోపణలపై విచారణ కొనసాగుతోంది.