సోనీ లివ్‌లోకి లోకేష్ కనకరాజ్ డీసీ.. ఐదు భాషల్లో స్ట్రీమింగ్

ఖైదీ, మాస్టర్, లియో, కూలీ వంటి సినిమాలతో గుర్తింపు తెచ్చుకున్న దర్శకుడు లోకేష్ కనకరాజ్, డీసీ చిత్రంతో నటుడిగా పరిచయమయ్యారు. నేషనల్ అవార్డు విజేత అరుణ్ మాథేశ్వరన్ దర్శకత్వం వహించిన ఈ యాక్షన్ థ్రిల్లర్‌లో వామికా గబ్బి కథానాయికగా నటించారు. సన్ పిక్చర్స్ నిర్మించిన ఈ చిత్రం రా అండ్ రస్టిక్ యాక్షన్‌తో ప్రేక్షకులను ఆకట్టుకుంది. బాక్సాఫీస్ వద్ద రూ.100 కోట్లకు పైగా వసూళ్లు సాధించినట్లు సమాచారం.

ఇప్పటికే సన్ నెక్స్ట్ ఓటీటీలో దక్షిణాది భాషల్లో అందుబాటులోకి వచ్చిన డీసీ సినిమా ఇప్పుడు సోనీ లివ్‌లోనూ స్ట్రీమింగ్ కానుంది. ఈ చిత్ర డిజిటల్ హక్కులను సోనీ లివ్ సొంతం చేసుకున్నట్లు వెల్లడించారు. అక్టోబర్ 16 నుంచి తెలుగు, హిందీ, తమిళ, కన్నడ, మలయాళ భాషల్లో ఈ సినిమా అందుబాటులోకి రానుంది. దీంతో మరింత మంది ప్రేక్షకులు ఈ యాక్షన్ థ్రిల్లర్‌ను ఓటీటీలో వీక్షించే అవకాశం ఉంది.