ఇద్దరు స్టార్ హీరోలు ఒకే సీజన్‌లో..?

మెగాస్టార్ చిరంజీవి, సూపర్ స్టార్ రజనీకాంత్ మరోసారి బాక్సాఫీస్ వద్ద పోటీ పడే అవకాశం కనిపిస్తోంది. 2023లో ఈ ఇద్దరి సినిమాలు ఒకేసారి విడుదలయ్యాయి. రజనీకాంత్ నటించిన ‘జైలర్’ ఆగస్టు 10న విడుదల కాగా, చిరంజీవి నటించిన ‘భోళా శంకర్’ ఆగస్టు 11న ప్రేక్షకుల ముందుకు వచ్చింది. ఆ పోరులో ‘జైలర్’ భారీ విజయాన్ని సాధించగా, ‘భోళా శంకర్’ నిరాశపరిచింది.

ఇప్పుడు అదే పరిస్థితి మళ్లీ పునరావృతమయ్యే అవకాశాలు ఉన్నాయని వార్తలు వినిపిస్తున్నాయి. చిరంజీవి ‘విశ్వంభర’ దసరా కానుకగా విడుదలకు సిద్ధమవుతుండగా, రజనీకాంత్ ‘జైలర్ 2’ కూడా అదే పండుగ సీజన్‌లో విడుదల కావచ్చని సమాచారం. దీంతో మరోసారి ఈ ఇద్దరు దిగ్గజాల మధ్య బాక్సాఫీస్ పోరు జరుగుతుందా అనే చర్చ మొదలైంది.