తమిళ్ ట్రెండింగ్ సాంగ్ తెలుగు వెర్షన్ రిలీజ్

గత ఏడాది నుంచి ఇన్‌స్టాగ్రామ్, యూట్యూబ్‌లలో ‘లవ్ ఇన్సూరెన్స్ కంపెనీ’ సినిమాలోని ‘ధీమా’ పాట చాలా వైరల్ అవుతోంది. ప్రదీప్ రంగనాథన్ హీరోగా, కృతీ శెట్టి హీరోయిన్‌గా నటిస్తున్న ఈ సినిమాకు విఘ్నేశ్ శివన్ దర్శకత్వం వహిస్తున్నారు. ఈ పాటకు లిరిక్స్ కూడా విఘ్నేశ్ శివన్ రాయగా, అనిరుధ్ రవిచందర్ తన స్వరంతో మరింత ఆకట్టుకునేలా చేశాడు. పాట విడుదలైనప్పటి నుంచి ప్రేక్షకులకి బాగా నచ్చింది.

ఇప్పుడు ఈ పాట తెలుగు వెర్షన్‌ను కూడా విడుదల చేశారు. “హృదయపు కోటే దోచేశావే.. ఇకపై నువ్వే నాకు మహారాణివే..” అంటూ ప్రారంభమయ్యే ఈ పాట అభిమానులను ఆకట్టుకుంటోంది. ఆలస్యంగా అయినా తెలుగులో రిలీజ్ చేసినందుకు ఫ్యాన్స్ సంతోషం వ్యక్తం చేస్తున్నారు. నయనతార నిర్మిస్తున్న ఈ సినిమాలో ఎస్‌జే సూర్య, యోగిబాబు, గౌరీ కిషన్, మాళవిక ముఖ్య పాత్రల్లో నటిస్తున్నారు. ఈ సినిమా తమిళ, తెలుగు భాషల్లో ఈ నెల10 న విడుదల కానుంది.