‘రావు బహదూర్’తో నా కెరీర్‌కు కొత్త అధ్యాయం - సత్యదేవ్

రాబోయే సైకాలజికల్ థ్రిల్లర్ ‘రావు బహదూర్’ తన కెరీర్‌లో అతిపెద్ద మలుపు అవుతుందని హీరో సత్యదేవ్ అన్నారు. ఈ నెల 3న ప్రపంచవ్యాప్తంగా విడుదల కానున్న ఈ చిత్రం తెలుగు ప్రేక్షకులు ఇంతకుముందెన్నడూ చూడని అనుభూతిని అందిస్తుందని చెప్పారు. సినిమా చూసిన తర్వాత సూపర్‌స్టార్ మహేష్ బాబు, నమ్రత శిరోద్కర్‌తో పాటు పలువురు సినీ ప్రముఖులు ప్రశంసించారని, మహేష్ బాబు అందించిన వాయిస్ ఓవర్ తనకు వెలకట్టలేని బహుమతిగా నిలిచిందని తెలిపారు.

ఈ చిత్రం సైకాలజికల్ డ్రామాతో పాటు మ్యాజికల్ రియలిజం, డార్క్ కామెడీ అంశాలను కలిగి ఉంటుందని సత్యదేవ్ చెప్పారు. ఇందులో రామప్ప పాత్ర తన కెరీర్‌లో అత్యంత సవాల్‌తో కూడుకున్నదని, ప్రతిరోజూ ఐదు గంటల మేకప్‌తో ఆ పాత్రలో పూర్తిగా లీనమయ్యానని వెల్లడించారు. ఈ సినిమా తర్వాత ప్రేక్షకులు తనను ‘రావు బహదూర్’కు ముందు, తర్వాత అన్నట్టుగా గుర్తుంచుకుంటారని ఆయన విశ్వాసం వ్యక్తం చేశారు.