దశాబ్దాల ప్రయాణానికి ప్రతిఫలం – టామ్ క్రూజ్‌కు అందిన గౌరవం!

ప్రపంచ సినీ రంగంలో అత్యంత ప్రభావవంతమైన నటుల్లో ఒకరైన టామ్ క్రూజ్, అద్భుతమైన నటన, ప్రాణాలకు తెగించే యాక్షన్ స్టంట్స్ చేసినా ఇప్పటివరకు ఒక సాధారణ ఆస్కార్ కూడా గెలుచుకోలేదు. నాలుగు దశాబ్దాల కెరీర్‌ ఉన్నప్పటికీ ఆయనకు ఆస్కార్ దక్కకపోవడం అనేక సినిమా ప్రేమికులను ఎప్పటినుంచో ఆశ్చర్యపరుస్తోంది. అయితే ఇప్పుడు హాలీవుడ్ ఆయనకు గౌరవవంతమైన గుర్తింపు ఇచ్చింది. లాస్ ఏంజెలెస్‌లో జరిగిన గవర్నర్స్ అవార్డ్స్ కార్యక్రమంలో టామ్ క్రూజ్‌కు ఆస్కార్ ప్రదానం చేశారు.

క్రూజ్‌తో పాటు డాలీ పాటన్, డెబ్బీ అలెన్, విన్ థామస్ వంటి ప్రముఖులను కూడా సినీ రంగానికి చేసిన విశిష్ట సేవలకుగాను అకాడమీ బోర్డు సత్కరించింది. టామ్ క్రూజ్ ముందు బోర్న్ ఆన్ ది ఫోర్త్ ఆఫ్ జులై, జెర్రీ మగ్వైర్, మ్యాగ్నోలియా చిత్రాలకు నటుడిగా ఆస్కార్ నామినేషన్లు పొందగా, 2023లో టాప్ గన్: మావెరిక్ తో నిర్మాతగా కూడా పోటీలో ఉన్నాడు. అయినప్పటికీ, అంతకాలం ఆస్కార్ ఆయన దరిచేరలేదు.

అవార్డు స్వీకరిస్తూ క్రూజ్ భావోద్వేగంగా స్పందించాడు: “సినిమా నన్ను ప్రపంచం అంతా తీసుకెళ్లింది. మన మధ్య ఉన్న తేడాలను అర్థం చేసుకోవడం నేర్పింది. థియేటర్‌లో మనం కలిసి నవ్వుతాం, అనుభూతి పంచుకుంటాం, అదే సినీ కళాశక్తి. సినిమాలు తీయడం నా పని మాత్రమే కాదు… నా స్వరూపం” అని తెలిపారు.