‘స్పిరిట్’ డేట్‌ను లాక్ చేసిన దిల్ రాజు..

ప్రభాస్ నటిస్తున్న ‘స్పిరిట్’ మార్చి 5 విడుదల తేదీ నుంచి తప్పుకోవడంతో బాక్సాఫీస్ వద్ద కీలకమైన రిలీజ్ స్లాట్ ఖాళీ అయింది. ఈ అవకాశాన్ని దిల్ రాజు నిర్మిస్తున్న ‘ఎల్లమ్మ’ వినియోగించుకున్నట్లు తెలుస్తోంది. ‘బలగం’ సినిమాతో గుర్తింపు తెచ్చుకున్న వేణు యెల్దండి దర్శకత్వంలో ఈ రూటెడ్ రస్టిక్ డ్రామా తెరకెక్కుతోంది. ప్రముఖ సంగీత దర్శకుడు దేవిశ్రీ ప్రసాద్ ఈ చిత్రంతో కథానాయకుడిగా పరిచయం అవుతున్నారు. తాజాగా విడుదల చేసిన పోస్టర్ ద్వారా మార్చి 5న సినిమాను థియేటర్లలోకి తీసుకురానున్నట్లు చిత్రబృందం ప్రకటించింది.

‘ఎల్లమ్మ’ చిత్రానికి దేవిశ్రీ ప్రసాద్ స్వయంగా సంగీతం అందిస్తున్నారు. ఈ సినిమాను పలు భారతీయ భాషల్లో భారీ స్థాయిలో విడుదల చేసేందుకు మేకర్స్ సన్నాహాలు చేస్తున్నారు. గ్రామీణ నేపథ్యం, విభిన్నమైన కథాంశం, దేవిశ్రీ ప్రసాద్ హీరోగా పరిచయం కావడం వంటి అంశాలు సినిమాపై ఆసక్తిని పెంచుతున్నాయి. మార్చి 5న ప్రేక్షకుల ముందుకు రానున్న ఈ చిత్రం బాక్సాఫీస్ వద్ద ఎలాంటి ఆదరణ పొందుతుంది, వసూళ్ల పరంగా ఎలాంటి విజయాన్ని సాధిస్తుంది అనేది చూడాలి.