ఫుడ్ డెలివరీ రంగంలోకి ఫ్లిప్‌కార్ట్.. ‘ఈట్-ఇన్ బై మినిట్స్’కు సన్నాహాలు

వాల్‌మార్ట్ యాజమాన్యంలోని ఈ-కామర్స్ సంస్థ ఫ్లిప్‌కార్ట్ భారత్‌లో ఆన్‌లైన్ ఫుడ్ డెలివరీ సేవను ప్రారంభించేందుకు సన్నాహాలు చేస్తున్నట్లు సమాచారం. ‘ఈట్-ఇన్ బై మినిట్స్’ పేరుతో తీసుకురానున్న ఈ సేవకు సంబంధించి బెంగళూరులో సుమారు 8,000 మంది ఉద్యోగులతో అంతర్గత పరీక్షలు నిర్వహించినట్లు టెక్ క్రంచ్ నివేదించింది. 2026 అక్టోబర్ నెలాఖరులోగా ఈ సేవను ప్రజలకు అందుబాటులోకి తీసుకురావాలని సంస్థ యోచిస్తున్నట్లు తెలుస్తోంది. ఈ సేవను ఫ్లిప్‌కార్ట్ ప్రస్తుత షాపింగ్ యాప్‌లోనే అందించే అవకాశం ఉంది. తద్వారా ఇప్పటికే ఫుడ్ డెలివరీ రంగంలో కార్యకలాపాలు నిర్వహిస్తున్న జొమాటో, స్విగ్గీ వంటి సంస్థలకు ఫ్లిప్‌కార్ట్ పోటీ ఇవ్వనుంది.

ఈ సేవ కోసం ఫ్లిప్‌కార్ట్ తన లాజిస్టిక్స్ విభాగమైన ఏకార్ట్ ద్వారా ప్రత్యేక డెలివరీ బృందాన్ని ఏర్పాటు చేస్తున్నట్లు సమాచారం. బెంగళూరులో ‘ఈట్-ఇన్ బై మినిట్స్’ బ్రాండింగ్‌తో కూడిన టీ-షర్టులు ధరించిన డెలివరీ సిబ్బంది కనిపించడం ఈ వార్తలకు బలం చేకూరుస్తోంది. రెస్టారెంట్ల జాబితాలో ఓఎన్‌డీసీ భాగస్వాములతో పాటు నేరుగా నమోదు చేసుకున్న రెస్టారెంట్లకు కూడా చోటు కల్పించే అవకాశం ఉంది. రెస్టారెంట్ల నుంచి సుమారు 10 శాతం బేస్ కమిషన్ వసూలు చేయాలనే ప్రతిపాదన ఉన్నట్లు సమాచారం. అయితే, సేవ ప్రారంభ తేదీ, కమిషన్ విధానం, ఇతర వాణిజ్య నిబంధనలపై అధికారిక ప్రకటన వెలువడాల్సి ఉంది.