లైగర్ కాంబో రిపీట్

విజయ్ దేవరకొండ హీరోగా దర్శకుడు రవి కిరణ్ కోలా తెరకెక్కిస్తున్న ‘రౌడీ జనార్దన్’ చిత్రంపై ఇప్పటికే మంచి అంచనాలు ఉన్నాయి. యాక్షన్, భావోద్వేగాలు, కమర్షియల్ అంశాలతో రూపొందుతున్న ఈ సినిమాకు సంబంధించి మరో ఆసక్తికర ప్రచారం సినీ వర్గాల్లో వినిపిస్తోంది. చిత్రంలో ఓ ప్రత్యేక గీతాన్ని ప్లాన్ చేస్తున్నారని, అందులో విజయ్ దేవరకొండతో కలిసి బాలీవుడ్ నటి అనన్య పాండే కనిపించే అవకాశముందని టాక్ నడుస్తోంది. గతంలో ‘లైగర్’లో వీరిద్దరి జోడీ కనిపించిన నేపథ్యంలో ఈ వార్త అభిమానుల్లో ఆసక్తిని పెంచుతోంది.

అంతేకాకుండా, ఈ చిత్రంలోని ఫ్లాష్‌బ్యాక్ ఎపిసోడ్ కథలో కీలకంగా ఉండనున్నట్లు సమాచారం. ఆ భాగంలో విజయ్ దేవరకొండ పూర్తి స్థాయి యాక్షన్ అవతారంలో కనిపిస్తారని సినీ వర్గాలు చెబుతున్నాయి. పాత్రలోని మరో కోణాన్ని దర్శకుడు ఆ ఎపిసోడ్ ద్వారా ఆవిష్కరించనున్నట్లు ప్రచారం సాగుతోంది. అయితే ప్రత్యేక గీతంలో అనన్య పాండే నటిస్తున్నారనే విషయంపై చిత్రబృందం నుంచి ఇప్పటివరకు ఎలాంటి అధికారిక ప్రకటన వెలువడలేదు.