సావిత్రిని అర్థం చేసుకోవడంలో విజయ చాముండేశ్వరి సహకారం కీలకం: కీర్తి సురేశ్

‘మహానటి’ చిత్రంలో సావిత్రి పాత్రను పోషించేందుకు తాను చేసిన సన్నాహాల గురించి నటి కీర్తి సురేశ్ ఆసక్తికర విషయాలను వెల్లడించారు. సావిత్రి నటించిన సినిమాలను లోతుగా అధ్యయనం చేసినప్పటికీ, ఆమె వ్యక్తిత్వాన్ని పూర్తిగా అర్థం చేసుకోవడానికి కుమార్తె విజయ చాముండేశ్వరితో మాట్లాడినట్లు తెలిపారు. ఆమె పంచుకున్న వ్యక్తిగత జ్ఞాపకాలు, కుటుంబ కథలు తనకు పాత్రను మరింత దగ్గర చేశాయని కీర్తి చెప్పారు.

సావిత్రి ఇచ్చిన పాత ఇంటర్వ్యూలు, అభిమానులు చెప్పిన అనుభవాలు, కుటుంబ సభ్యుల జ్ఞాపకాలు అన్నీ కలిసి ఆమె వ్యక్తిత్వాన్ని ఊహించుకోవడంలో ఎంతో ఉపయోగపడ్డాయని పేర్కొన్నారు. ఆ వివరాల ఆధారంగా సావిత్రి పాత్రకు ప్రాణం పోయగలిగానని కీర్తి వెల్లడించారు. 2018లో విడుదలైన మహానటి చిత్రానికి నాగ్ అశ్విన్ దర్శకత్వం వహించగా, ఈ పాత్రకు గాను కీర్తి సురేశ్ ఉత్తమ నటిగా జాతీయ చలనచిత్ర అవార్డును అందుకున్నారు.