రామ్ ట్యాగ్‌ ల మార్పు వెనుక ఆసక్తికర నిజాలు

స్టార్ ఇమేజ్ వచ్చాక హీరో పేరుకి ఒక ట్యాగ్ అంటిపెట్టుకోవడం సినిమా ఇండస్ట్రీలో సర్వసాధారణం. హీరోకి వ్యక్తిగతంగా అది నచ్చకపోయినా- ద‌ర్శకులు, నిర్మాతలు, అభిమానుల డిమాండ్‌తో ఆ ట్యాగ్ తప్పనిసరిగా పేరుకు జత అవుతుంది. కొందరు తమ ఇమేజ్ మారినప్పుడల్లా బిరుదులు కూడా మార్చుకుంటుంటారు. కొన్ని మార్పులు సరిగ్గా నచ్చక మళ్లీ పాత ట్యాగ్‌కి తిరిగి వెళ్లిన సందర్భాలూ ఉన్నాయి.

ఇటీవ‌ల రామ్ చరణ్ ‘గ్లోబల్ స్టార్’ను పక్కన పెట్టి, అభిమానుల కోరిక మేరకు తిరిగి ‘మెగా పవర్ స్టార్’ బిరుదునే వాడడం అందరికీ తెలుసు.అదే విధంగా యంగ్ హీరో రామ్ కూడా కొన్నేళ్లుగా వాడుతున్న ‘ఉస్తాద్’ ట్యాగ్‌ను ఇప్పుడు వదిలేశాడు. రాబోయే ఆంధ్ర కింగ్ తాలూకా లో ఆయనను మళ్లీ పాత ‘ఎనర్జిటిక్ స్టార్’ గా చూడబోతున్నాం. ఈ బిరుదుల వ్యవహారం గురించి ఇటీవల ఓ ఇంటర్వ్యూలో రామ్ ఆసక్తికర విషయాలు వెల్లడించాడు.

తన పేరుకి ట్యాగ్‌లు పెట్టుకోవడం అసలు తనకు ఇష్టం లేదని స్పష్టంచేశాడు. కెరీర్ ప్రారంభంలో అభిమానులు, నిర్మాత‌ల ఒత్తిడికి ఓకే చెప్పాల్సి వచ్చిందని తెలిపాడు. వాళ్లంతా కలసి ఒక ట్యాగ్ నిర్ణయించి, తమ చిత్రాల టైటిల్స్‌లో కూడా ఉపయోగించారని- అభిమానులు బేనర్లలో విస్తృతంగా వాడేవారని గుర్తుచేశాడు.

కానీ ఆ ట్యాగ్‌ను తాను తర్వాత వదిలేశానని రామ్ చెప్పాడు. అంతేకాక, మరో హీరో అదే ట్యాగ్‌ను వాడడం ప్రారంభించడంతో తాను ఏం చేయలేక నిశ్శబ్దంగా ఉండిపోయానని చెప్పాడు. ఆ హీరో ఎవరని అడిగితే మాత్రం సమాధానం ఇవ్వకుండా నవ్వుతూ తప్పుకున్నాడు.ఆ తరువాత రామ్‌ను అభిమానులు ‘స్టైలిష్ స్టార్’ అని పిలవడం మొదలైంది. కానీ అల్లు అర్జున్ ఆ బిరుదును తీసుకున్నాక, రామ్ ‘ఎనర్జిటిక్ స్టార్‌ గా’ మారిపోయాడు. తరువాత మళ్లీ రామ్ ‘ఉస్తాద్’ గా మారగా, ఆ ట్యాగ్ పవన్ కళ్యాణ్ అభిమానులను కొద్దిగా అసహనానికి గురి చేసింది. పైగా ‘ఉస్తాద్’ ట్యాగ్ రామ్‌కు పెద్దగా సెట్ కాలేదనే అభిప్రాయం వ్యక్తమైంది. అందుకే ఆయన తిరిగి తనకు సూట్ అయ్యే ‘ఎనర్జిటిక్ స్టార్’ బిరుదునే ఎంచుకున్నట్లు కనిపిస్తోంది.