ఘంటసాల బయోపిక్ టీజర్ రిలీజ్ - కళ్ళు తడిచేలా చేసింది!

లెజెండరీ గాయకుడు ఘంటసాల వెంకటేశ్వరరావు జీవిత కథ ఆధారంగా రూపొందిన బయోపిక్ “ఘంటసాల ది గ్రేట్” టీజర్‌ను శనివారం ప్రత్యేక ఈవెంట్‌లో విడుదల చేశారు. అన్యూక్త రామ్ పిక్చర్స్ బ్యానర్‌పై సి.హెచ్. ఫణి నిర్మించిన ఈ సినిమాకు కథ, స్క్రీన్‌ప్లే, దర్శకత్వం సి.హెచ్. రామారావు అందించారు. ఘంటసాల పాత్రలో కృష్ణచైతన్య, సావిత్రమ్మగా మృదుల, చిన్న ఘంటసాలగా అతులిత, కీలక పాత్రలో సీనియర్ నటుడు సుమన్ కనిపించనున్నారు. చీఫ్ గెస్ట్‌గా వచ్చిన ఆదిత్య హసన్ టీజర్ విడుదల చేసి, ఈ కథ భావోద్వేగభరితమైందని అన్నారు. సినిమా డిసెంబర్ 12న విడుదలవుతుంది.

ఘంటసాలగా నటించిన కృష్ణచైతన్య, “ఇలాంటి మహానుభావుడి పాత్ర పోషించడం నాకు వరం” అని తెలిపారు. ప్రీవ్యూ చూసిన వారు భావోద్వేగంతో కంటతడి పెట్టారని చెప్పారు. దర్శకుడు రామారావు మాట్లాడుతూ, “ఘంటసాల గారి గొంతు వెనక ఉన్న మనిషిని చూపించడం మా లక్ష్యం” అన్నారు. సినిమా విడుదలను అడ్డుకునేందుకు ప్రయత్నాలు జరిగినా, డిసెంబర్ 12న థియేటర్లకు తప్పక వస్తుందని ధైర్యంగా చెప్పారు.

సినిమా జట్టు ధైర్యాన్ని పలువురు ప్రశంసించారు. రామసత్య నారాయణ రాజు, ఈ సినిమా భావోద్వేగం మహానటి స్థాయిలో ఉంటుందని అన్నారు. శోభారాణి, ఘంటసాల గారి సంగీత ప్రతిభతో పాటు స్వాతంత్ర్యోద్యమంలో చేసిన సేవలను గుర్తుచేశారు. కర్రి బాలాజీ, చిత్రంలోని నటన చాలా సహజంగా ఉందని అన్నారు. సంగీతం సాలూరి వాసురావు, ఛాయాగ్రహణం వేణు మురళీధర్, పీఆర్‌ఓ సాయి సతీష్. టీజర్‌కు మంచి స్పందన రావడంతో, ఘంటసాల వారసత్వాన్ని సెలబ్రేట్ చేసే ఈ చిత్రం డిసెంబర్ 12 విడుదలపై టీమ్‌కు పూర్తి నమ్మకం ఉంది.