కీర్తి సురేష్ ఫ్లాప్‌ల ప్రవాహానికి రివాల్వర్ రీటా బ్రేక్ అవుతుందా?

ఏడు సంవత్సరాల క్రితం ‘మహానటి’ విడుదలైన తర్వాత కీర్తి సురేష్ కెరీర్ భారీ స్థాయికి వెళ్లిపోతుందని అందరూ భావించారు. ఆ సినిమాలో ఆమె నటనను మరే హీరోయిన్ సులభంగా మ్యాచ్ చేయలేరనేది నిజం. అంత పాపులారిటీ వచ్చిన తర్వాత మహేష్ బాబు వంటి స్టార్ హీరోతో నటించినా, ఆశించిన ఫలితం రాలేదు.నితిన్ లాంటి టయర్ 2 హీరోలతో నటించినా మిస్ ఇండియా అంటూ తను మాత్రమే ఉండే టైటిల్ రోల్స్ చేసినా అన్నీ దారుణంగా పోయాయి.

ఇప్పుడేమో నవంబర్ 28న ‘రివాల్వర్ రీటా’గా ప్రేక్షకుల ముందుకు రాబోతోంది. ఎన్నో వాయిదాల తర్వాత ఈ సినిమా చివరకు విడుదలకు సిద్ధమైంది.

తాజాగా విడుదలైన ట్రైలర్‌లో కథను స్పష్టంగా చూపించారు. ఒక పెద్ద మాఫియా డాన్ (సునీల్) తండ్రి అకస్మాత్తుగా కనిపించకుండా పోతాడు. అతన్ని ఎవరైనా కిడ్నాప్ చేశారని అందరూ అనుకుంటుండగా, రీటా (కీర్తి సురేష్) ఇంట్లోనే ఆయన శవమై ఉంటాడు. ఈ విషయాన్ని బయటకు రాకుండా కుటుంబం జాగ్రత్తలు తీసుకుంటుంది. తల్లి (రాధికా) సహాయంతో రీటా శవం మాయం చేయాలని నిర్ణయిస్తుంది. మరోవైపు, తండ్రి కనిపించకపోవడంతో ఆ డాన్ పిచ్చివాడిలా అనుమానం వచ్చిన వారిని చంపుకుంటూ సాగుతాడు. చివరికి నిజంగా ఏమైందనేది తెరపై చూడమంటున్నారు దర్శకుడు జెకే చంద్రు.

టేకింగ్‌ పరంగా చూసుకుంటే అంతగా కొత్తదనం అనిపించదు. ‘కోకో కోకిలా’ నుండి ‘కీడా కోలా’ వరకు ప్రేక్షకులు చాలానే డార్క్ కామెడీ సినిమాలు చూసారు. ‘రివాల్వర్ రీటా’ వాటి కంటే ఎంత కొత్తదనం చూపిస్తుందో చూడాలి. పైగా ఇదే సమయంలో రామ్ నటించిన ‘ఆంధ్ర కింగ్ తాలూకా’ కూడా పోటీలో ఉంది. వారంరోజుల్లోనే బాలయ్య ‘అఖండ 2’ రాబోతోంది. ఇంత పోటీ నడుమ ‘రివాల్వర్ రీటా’ ప్రత్యేకంగా నిలవడం కొంచెం కష్టమే.

గత ఏడు సంవత్సరాల్లో ‘దసరా’, ‘సర్కారు’ తప్ప కీర్తి సురేష్ మాట్లాడుకునే హిట్‌లు లేవు. పదిహేనుకు పైగా ఫ్లాప్‌లు రావడం ఆశ్చర్యమేసినా అదే నిజం. ఇక ‘రివాల్వర్ రీటా’ ఆమె కెరీర్‌కు తగిన బ్రేక్ ఇస్తుందా లేదా అనేది చూడాలి.