అఖిల్ 'లెనిన్' నుంచి 'జయమంగళం' మెలోడీ విడుదల..

అక్కినేని అఖిల్ కథానాయకుడిగా నటిస్తున్న 'లెనిన్' చిత్రం నుంచి అభిమానులు ఎంతో ఆసక్తిగా ఎదురుచూస్తున్న తొలి మెలోడీ పాట 'జయమంగళం' లిరికల్ వీడియోను చిత్రబృందం విడుదల చేసింది. సంగీత దర్శకుడు తమన్ ఎస్ స్వరపరిచిన ఈ పాట తన మధురమైన ట్యూన్, హృద్యమైన సాహిత్యంతో సంగీత ప్రియులను ఆకట్టుకుంటోంది. విడుదలైన కొద్దిసేపటికే ఈ పాటకు ప్రేక్షకుల నుంచి విశేష స్పందన లభిస్తోంది.

మురళి కిశోర్ అబ్బూరు దర్శకత్వంలో తెరకెక్కుతున్న ఈ చిత్రాన్ని నాగార్జున అక్కినేని, సూర్యదేవర నాగవంశీ సంయుక్తంగా సితార ఎంటర్‌టైన్‌మెంట్స్ బ్యానర్‌పై నిర్మిస్తున్నారు. నవీన్ నూలి ఎడిటర్‌గా, లియోన్ బ్రిట్టో సినిమాటోగ్రాఫర్‌గా పనిచేస్తున్న ఈ చిత్రం ప్రస్తుతం ప్రమోషన్ కార్యక్రమాలను వేగవంతం చేసింది. తొలి సింగిల్ 'జయమంగళం'తో సినిమాపై అంచనాలు మరింత పెరగగా, జులై 10న ప్రపంచవ్యాప్తంగా ఈ చిత్రం ప్రేక్షకుల ముందుకు రానుంది.