పెట్రోల్‌లో ఇథనాల్‌పై కొత్త వివాదం..రంగంలోకి చమురు సంస్థలు

కర్ణాటకలో పరీక్షించిన ఐదు పెట్రోల్ నమూనాల్లో నాలుగింటిలో 26–31 శాతం ఇథనాల్ ఉన్నట్లు రాష్ట్ర ప్రభుత్వం చేసిన వాదనను ప్రభుత్వ రంగ చమురు మార్కెటింగ్ సంస్థలు ఇండియన్ ఆయిల్ కార్పొరేషన్ (IOCL), భారత్ పెట్రోలియం కార్పొరేషన్ (BPCL), హిందుస్థాన్ పెట్రోలియం కార్పొరేషన్ (HPCL) ఖండించాయి. కర్ణాటకలో పరీక్షించిన 56 నమూనాల్లో ఇథనాల్ శాతం 19 నుంచి 20 మధ్య ఉన్నట్లు, సగటున 19.30 శాతంగా నమోదైనట్లు సంస్థలు వెల్లడించాయి. దేశవ్యాప్తంగా 27 రాష్ట్రాలు, కేంద్రపాలిత ప్రాంతాల్లో పరీక్షించిన 893 నమూనాలు కూడా నిర్దేశిత ప్రమాణాలకు అనుగుణంగా ఉన్నాయని, వాటిలో ఇథనాల్ శాతం 19 నుంచి 21 మధ్య ఉందని పేర్కొన్నాయి.

నమూనాల సేకరణ, పరీక్షల విధానంపై చమురు సంస్థలు అభ్యంతరాలు వ్యక్తం చేశాయి. అక్టోబర్‌లో నమూనాలు సేకరించిన సమయంలో చమురు మార్కెటింగ్ సంస్థల ప్రతినిధులు ఎవరూ అక్కడ లేరని, పరీక్షలకు అవసరమైన పత్రాలు, రెండో సెట్ నమూనాలు కూడా అందించలేదని ఆరోపించాయి. అలాగే, IS 17021 ప్రకారం పాటించాల్సిన పరీక్షా విధానాన్ని అనుసరించలేదని పేర్కొంటూ కర్ణాటక ప్రభుత్వ పరీక్షా పద్ధతిని ప్రశ్నించాయి. పెట్రోల్‌లో ఇథనాల్ శాతాన్ని నిర్ధారించే ప్రక్రియపై ఈ వివాదం దృష్టి సారించింది.