‘42 నిబంధనలు’ వివాదం... అల్లు అర్జున్‌పై వ్యాఖ్యలకు కావేరి క్షమాపణ

స్టార్ హీరో అల్లు అర్జున్‌ను కలవాలంటే 42 నిబంధనలు పాటించాలంటూ బ్రాండ్ స్ట్రాటజిస్ట్ కావేరి బరూవా చేసిన వ్యాఖ్యలు ఇటీవల సామాజిక మాధ్యమాల్లో వైరల్ అయ్యాయి. ఈ వ్యాఖ్యలపై తాజాగా ఆమె క్షమాపణలు తెలిపారు. తన మాటలు తప్పుగా బయటకు వెళ్లాయని, అవి వాస్తవం కాదని స్పష్టం చేశారు. అల్లు అర్జున్ గౌరవానికి భంగం కలిగించి ఉంటే దానికి తాను విచారిస్తున్నానని చెప్పారు. ఈ వ్యాఖ్యలను వెనక్కి తీసుకుంటున్నట్లు ఎక్స్ వేదికగా వెల్లడించారు.

తన పాడ్‌కాస్ట్‌లో మాట్లాడిన సమయంలో 42 నిబంధనలు ఉన్నాయని చెప్పడం సరైంది కాదని ఆమె అంగీకరించారు. అల్లు అర్జున్ లేదా ఆయన బృందం నుంచి అలాంటి ఎలాంటి అధికారిక పత్రం లేదని తెలిపారు. ఆ మాటలు అనుకోకుండా బయటకు వచ్చాయని చెప్పారు. తన వ్యాఖ్యల వల్ల హీరో ప్రతిష్ఠకు నష్టం కలిగితే క్షమించాలన్నారు.

పాడ్‌కాస్ట్‌లో ఆమె మాట్లాడుతూ, దక్షిణాది నటులను కలిసే సమయంలో కొన్ని నియమాలు పాటించాల్సి ఉంటాయని అన్నారు. అల్లు అర్జున్‌తో ఒక ప్రకటన చిత్రీకరణ సమయంలో తాను ప్రత్యేక అనుభవం ఎదుర్కొన్నట్లు చెప్పారు. హీరోను కలిసే ముందు చేయాల్సినవి, చేయకూడనివి ఉంటాయని, మేనేజర్లు ఈ విషయంలో కఠినంగా ఉంటారని అన్నారు. షేక్‌హ్యాండ్ ఇవ్వకూడదు, దూరం పాటించాలి, సెట్‌లో ఫోన్ వాడకూడదని ఆమె వ్యాఖ్యానించారు. అయితే ఇవి నిజమైన అధికారిక నిబంధనలు కావని ఆమె స్పష్టం చేశారు.