బీసీ నాయకుడిగా నవీన్‌ను ముందుకు తేవాలన్నది కాంగ్రెస్ ప్లానా?

ముఖ్యమంత్రి రేవంత్ రెడ్డి నాయకత్వంలో కాంగ్రెస్ పార్టీ, 2023 ఎన్నికల్లో బీఆర్‌ఎస్‌కు కోల్పోయిన జూబ్లిహిల్స్ స్థానాన్ని తిరిగి సాధించింది. రెండు సంవత్సరాల పాలనపై ప్రజలు సంతృప్తిగా ఉన్నారన్న సంకేతంగా నవీన్ యాదవ్ విజయం భావిస్తున్నారు. ఈ ఫలితం స్థానిక సంస్థల ఎన్నికల ముందు పార్టీకి భారీ ఉత్సాహం నింపింది. 2023 ఎన్నికల్లో గ్రేటర్ హైదరాబాద్‌లో ఒక్క ఎమ్మెల్యే స్థానమూ గెలవలేకపోయినా, ఇప్పుడు సికింద్రాబాద్ కాంటోన్మెంట్ మరియు జూబ్లిహిల్స్ రెండు బై పోల్స్‌ను గెలుచుకుని కాంగ్రెస్ బలంగా నిలిచింది. ఇప్పుడు అదే ఊపును జీహెచ్ఎంసీ ఎన్నికల్లో కొనసాగించాలని హై కమాండ్ లక్ష్యంగా పెట్టుకుంది.

ఇకపోతే పార్టీ అంతర్గతంగా వస్తున్న సమాచారమేమిటంటే  జూబ్లిహిల్స్ ఎమ్మెల్యే నవీన్ యాదవ్‌కి రేవంత్ ప్రభుత్వం కీలక పదవి ఇవ్వాలని ఆలోచనలో ఉన్నట్లు తెలుస్తోంది. క్యాబినెట్ పదవో, లేక విప్ స్థాయిలో ఉన్న ప్రాధాన్యమైన పదవో వచ్చే అవకాశం ఉందని చర్చ సాగుతోంది. బీసీ వర్గానికి చెందిన నాయకుడిని పదవిలోకి తీసుకువస్తే అది రాజకీయ లాభం ఇస్తుందని కాంగ్రెస్ భావిస్తోంది.

ఇటీవల మైనార్టీ నేత మొహమ్మద్ అజారుద్దీన్‌ను కేబినెట్‌లోకి తీసుకోవడం కూడా ముస్లిం ఓటర్లను ఆకర్షించాలనే వ్యూహంగానే చెప్పబడుతోంది. ఈ నేపథ్యంలో నవీన్ యాదవ్‌కు పదవి లభిస్తే అది అతనికి గట్టి అదృష్టమనే చెప్పాలి. రెండేళ్ల క్రితమే కాంగ్రెస్‌లో చేరిన ఆయన, ఒక్క బైపోల్ గెలుపుతోనే ప్రభుత్వం, పార్టీ వ్యూహంలో కీలక వ్యక్తిగా మారడం అతని ఎదుగుదలకి పెద్ద ఉదాహరణ.