రవి తేజ - సమంత కలిసి పనిచేస్తారా? ఇండస్ట్రీలో హాట్ టాపిక్!

రవితేజ ఇటీవల విడుదలైన మాస్ జాతర తో ఎదుర్కొన్న నిరాశ ఇంకా పూర్తిగా తగ్గలేదు. ఊహించిన రేంజ్‌లో సినిమా నడవకపోవడంతో ఆయన కెరీర్‌కు చిన్న జర్క్ వచ్చింది. ఇదే సమయంలో, ఆయన మరో చిత్రం భర్త మహాశయులకు విజ్ఞప్తి ఇప్పటికే సంక్రాంతి 2026 రిలీజ్ కోసం లాక్ అయింది. అయితే ఇప్పుడు ఇండస్ట్రీలో హాట్ టాపిక్‌గా మారింది రవి తేజ–సమంత కాంబినేషన్ గురించి వస్తున్న వార్త.

ఇండస్ట్రీ వర్గాల సమాచారం ప్రకారం రవి తేజ తన తదుపరి చిత్రాన్ని దర్శకుడు శివ నిర్వాణ తో చేయడానికి ఒప్పందం కుదుర్చుకున్నాడు. శివ నిర్వాణ కు భావోద్వేగాలతో పాటు కమర్షియల్ టచ్ ఉన్న సినిమాలు తీసే దర్శకుడిగా పేరుంది. ఈ సినిమాలో హీరోయిన్‌గా సమంతను తీసుకోవాలని టీమ్ ఆలోచిస్తున్నట్లు బలమైన సమాచారం వస్తోంది. చర్చలు జరగుతున్న దశలోనే ఈ కాంబో పై అభిమానుల్లో ఉత్సాహం పెరిగింది.

శివ నిర్వాణ తో సమంతకి ఇప్పటికే మంచి రికార్డు ఉంది. మజిలీ, ఖుషి సినిమాలతో ఇద్దరి కలయికకు మంచి గుర్తింపు వచ్చింది. ఈ కొత్త ప్రాజెక్ట్‌కు సమంత గ్రీన్ సిగ్నల్ ఇస్తే, ఇది ఆమెకు చాలా రోజుల తర్వాత లభించే భారీ కమర్షియల్ బ్రేక్ అవుతుంది. అలాగే రవి తేజతో ఆమెకి ఇదే తొలి సినిమా అవుతుంది. ఇటీవల ఫ్లాప్స్ వచ్చిన రవి తేజకు స్టార్ హీరోయిన్ కాంబినేషన్ రావడం మళ్లీ హైప్ తెచ్చే అవకాశం ఉంది. అన్నీ సవ్యంగా జరిగితే, ఈ సినిమా రాబోయే రోజులలో అత్యంత ఆసక్తికర ప్రాజెక్ట్‌లలో ఒకటిగా నిలవడం ఖాయం.