ఉత్తరాదిలో ‘జైలర్ 2’కు మల్టీప్లెక్స్ చిక్కులు

సూపర్‌స్టార్ రజనీకాంత్, దర్శకుడు నెల్సన్ దిలీప్‌కుమార్ మరోసారి ‘జైలర్ 2’తో ప్రేక్షకుల ముందుకు రానున్నారు. దక్షిణాది మార్కెట్లలో సినిమా ప్రచారం జోరుగా సాగుతున్నప్పటికీ, ఉత్తర భారతదేశంలో హిందీ వెర్షన్ విడుదలకు ఇబ్బందులు ఎదురవుతున్నట్లు సమాచారం. పీవీఆర్ ఐనాక్స్, సినీపోలిస్ వంటి ప్రముఖ మల్టీప్లెక్స్‌ సంస్థలు ఈ చిత్రాన్ని ప్రదర్శించకపోవచ్చని వార్తలు వస్తున్నాయి. ఓటీటీ విడుదలకు సంబంధించిన గడువుపై నిర్మాతలు, మల్టీప్లెక్స్‌ సంస్థల మధ్య ఏకాభిప్రాయం కుదరకపోవడమే ఇందుకు కారణంగా తెలుస్తోంది.

థియేటర్లలో విడుదలైన నాలుగు వారాలకే ఓటీటీలోకి తీసుకురావాలని నిర్మాతలు భావిస్తుండగా, హిందీ చిత్రాలకు ఎనిమిది వారాల విరామం ఉండాలని జాతీయ మల్టీప్లెక్స్‌ సంస్థలు పట్టుబడుతున్నట్లు సమాచారం. దీంతో ఉత్తరాది రాష్ట్రాల్లో హిందీ వెర్షన్ సింగిల్ స్క్రీన్ థియేటర్లకే పరిమితమయ్యే అవకాశం ఉంది. సన్ పిక్చర్స్ నిర్మించిన ఈ చిత్రంలో మోహన్‌లాల్, శివరాజ్‌కుమార్, హృతిక్ రోషన్ అతిథి పాత్రల్లో కనిపించనున్నారు. మరోవైపు, హైదరాబాద్‌లో ఈ సాయంత్రం జరగనున్న తెలుగు ప్రీ-రిలీజ్ వేడుకలో సంగీత దర్శకుడు అనిరుధ్ రవిచందర్ ప్రత్యక్ష సంగీత ప్రదర్శన ఇవ్వనున్నారు.