ఏ గ్రహ దోషానికి ఏ పండు దానం చేయాలి? నవగ్రహ శాంతికి ఫలదాన విశేషాలు ఇవే!

హిందూ సంప్రదాయంలో దానధర్మాలకు ఎంతో ప్రాధాన్యత ఉంది. ముఖ్యంగా కార్తిక మాసంలో చేసే దానాలు విశేషమైన పుణ్యాన్ని అందిస్తాయని భక్తులు నమ్ముతారు. ఈ మాసంలో పండ్లను దానం చేయడం వల్ల నవగ్రహాల అనుగ్రహం లభిస్తుందని జ్యోతిష్య విశ్వాసం. బృహన్నారదీయంలో కూడా ఒక్కో గ్రహానికి ఒక్కో పండును దానం చేయాలని వివరించారు. గ్రహాల అనుకూలత కోసం ఏ రోజు ఏ పండును దానం చేయాలో తెలుసుకుందాం.

సూర్యుడి అనుగ్రహం కోసం ఆదివారం దబ్బపండును దానం చేయాలని చెబుతారు. చంద్రుడికి సోమవారం అరటిపండ్లు, కుజుడికి మంగళవారం దానిమ్మ పండ్లు సమర్పించాలి. బుధుడి కోసం బుధవారం మామిడి పండ్లు, గురుడి కోసం గురువారం పనసపండు, శుక్రుడి కోసం శుక్రవారం ఖర్జూరం దానం చేయాలని సూచించారు. శనివారం శనీశ్వరుడి అనుగ్రహం కోసం నేరేడు పండ్లు ఇవ్వాలి. రాహు గ్రహానికి కొబ్బరికాయను, కేతువుకు పెద్ద దబ్బపండును దానం చేయాలని బృహన్నారదీయంలో పేర్కొన్నట్లు జ్యోతిష్య సంప్రదాయం చెబుతోంది. ఈ విధంగా ఆయా గ్రహాలకు సంబంధించిన పండ్లను దానం చేయడం వల్ల గ్రహ దోషాల ప్రభావం తగ్గి శుభ ఫలితాలు కలుగుతాయని భక్తుల విశ్వాసం.

గమనిక:

ఈ కథనంలో పేర్కొన్న ఫలదాన విధానాలు, వాటి వల్ల కలిగే ప్రయోజనాలు జ్యోతిష్యశాస్త్రం, మత విశ్వాసాల ఆధారంగా వివరించినవి. వీటికి ఆధునిక శాస్త్రీయ ఆధారాలు లేవు. వీటిని ఆచరించాలా వద్దా అనేది పూర్తిగా వ్యక్తిగత నిర్ణయం.