సారపాకలో డ్రైన్ నిర్మాణంపై స్థానికుల ఆగ్రహం..

సారపాక నుంచి సత్యనారాయణ గుడి వరకు చేపడుతున్న డ్రైన్ నిర్మాణ పనులపై స్థానికులు అసంతృప్తి వ్యక్తం చేస్తున్నారు. ప్రధాన రహదారి మధ్య నుంచి 35 అడుగుల దూరంలో డ్రైన్ నిర్మించాలని పాలకవర్గం నిర్ణయించినట్లు స్థానికులు పేర్కొంటున్నారు. ఈ నిర్ణయం మేరకు పనులు ప్రారంభమైనప్పటికీ, ప్రస్తుతం కొన్ని ప్రాంతాల్లో నిర్ణీత దూరాన్ని పాటించకుండా నిర్మాణం చేపడుతున్నారని వారు ఆరోపిస్తున్నారు.

డ్రైన్ నిర్మాణంలో అందరికీ ఒకే విధమైన నిబంధనలు అమలు చేయాలని స్థానికులు కోరుతున్నారు. సారపాక నుంచి మణుగూరు వెళ్లే ప్రధాన రహదారిపై వాహనాల రాకపోకలకు ఇబ్బందులు కలగకుండా అధికారులు తగిన చర్యలు తీసుకోవాలని విజ్ఞప్తి చేస్తున్నారు. నిర్ణయించిన 35 అడుగుల దూరాన్ని పాటిస్తూ నిర్మాణ పనులు పూర్తి చేయాలని డిమాండ్ చేస్తున్నారు. ఈ ఆరోపణలపై అధికారుల స్పందన తెలియాల్సి ఉంది.