జంతర్‌మంతర్‌ నిరసనకారులకు రాహుల్‌ గాంధీ మద్దతు

దిల్లీలోని జంతర్‌మంతర్‌ వద్ద నిరసన చేపట్టిన కాక్రోచ్‌ జనతా పార్టీ (సీజేపీ) నేతలు సౌరవ్‌ దాస్‌, అశుతోష్‌ రంకాలకు కాంగ్రెస్‌ అగ్రనేత రాహుల్‌ గాంధీ సంఘీభావం తెలిపారు. శాంతియుతంగా ఆందోళన చేస్తున్న వారిని అరెస్టు చేయడాన్ని ఆయన తప్పుబట్టారు. జాతీయ జెండాను ప్రదర్శిస్తూ నిరసన తెలపడం నేరం కాదని, అలా చేసిన యువకులపై కేసులు నమోదు చేసి జైలుకు పంపడం ఏమిటని ప్రశ్నించారు. రాజ్యాంగం కల్పించిన హక్కులను కాపాడుకోవడం అందరి బాధ్యతని, జంతర్‌మంతర్‌ను తిరిగి నిరసన వేదికగా సాధించుకుంటామని రాహుల్‌ గాంధీ ‘ఎక్స్‌’లో పేర్కొన్నారు.

రాహుల్‌ గాంధీ వ్యాఖ్యలపై కాక్రోచ్‌ జనతా పార్టీ వ్యవస్థాపకుడు అభిజీత్‌ దీప్కే స్పందిస్తూ ఆయనకు ధన్యవాదాలు తెలిపారు. జంతర్‌మంతర్‌ను నిరసన వేదికగా ఉపయోగించకుండా నిషేధిస్తూ దిల్లీ పోలీసులు ఇటీవల ప్రకటన విడుదల చేశారు. ఈ నిర్ణయాన్ని సీజేపీ తీవ్రంగా వ్యతిరేకించింది. ఈ నేపథ్యంలో పార్టీ ముఖ్య నేతలు జంతర్‌మంతర్‌ వద్దకు చేరుకుని నిరసన తెలిపేందుకు ప్రయత్నించగా, నిబంధనలు ఉల్లంఘించారనే కారణంతో పోలీసులు వారిని అరెస్టు చేసి జైలుకు తరలించారు.