ప్రతి కుటుంబానికి ఒకే కార్డు.. సంక్షేమ సేవల్లో కొత్త మార్పు?

తెలంగాణ ప్రభుత్వం సంక్షేమ పథకాల అమలును మరింత పారదర్శకంగా, సమర్థవంతంగా నిర్వహించేందుకు సమగ్ర సంక్షేమ కార్డు రూపకల్పనకు శ్రీకారం చుట్టింది. ముఖ్యమంత్రి రేవంత్ రెడ్డి ఆదేశాల మేరకు రాష్ట్రంలోని ప్రతి పౌరుడి పూర్తి వివరాలు ఒకే వేదికపై అందుబాటులో ఉండే విధంగా ఈ కార్డును రూపొందించనున్నారు. వివిధ శాఖల ద్వారా అందుతున్న సంక్షేమ పథకాలు, లబ్ధిదారులకు చేరిన ప్రయోజనాలు స్పష్టంగా నమోదు అయ్యేలా ప్రత్యేక డిజైన్ సిద్ధం చేయనున్నట్లు సమాచారం.

ఈ ప్రక్రియలో భాగంగా లబ్ధిదారుల డేటాను సేకరించేందుకు ప్రత్యేక డ్రైవ్ నిర్వహించనున్నారు. సమగ్ర ఇంటింటి కుటుంబ సర్వే వివరాలను ఈ కార్డుతో అనుసంధానం చేయడంతో పాటు, ప్రజల ఆరోగ్య ప్రొఫైల్‌ను కూడా లింక్ చేయాలని ప్రభుత్వం యోచిస్తోంది. దీంతో పౌరులకు అందుతున్న ప్రభుత్వ సేవలపై పూర్తి సమాచారం ఒకేచోట లభించనుండగా, సంక్షేమ పథకాల అమలు మరింత సులభతరం కానుంది.