కాంక్రీట్‌కు బదులుగా పచ్చదనం.. చెట్లతో వేడిని జయించిన మెడెలిన్ నగరం

పెరుగుతున్న ఉష్ణోగ్రతలు, పట్టణ వేడి సమస్యలను ఎదుర్కొంటున్న కొలంబియాలోని మెడెలిన్ నగరం ప్రకృతిని ఆధారంగా చేసుకుని వినూత్న పరిష్కారాన్ని అమలు చేసింది. గ్రీన్ కారిడార్స్ ప్రోగ్రామ్ ద్వారా రోడ్లు, పార్కులు, నది పరిసరాలు, ప్రజా ప్రదేశాల్లో సుమారు 8.8 లక్షల చెట్లు, 25 లక్షల పొదలు, మొక్కలను నాటింది.

2016లో ప్రారంభమైన ఈ కార్యక్రమంలో భాగంగా 30 గ్రీన్ కారిడార్లను ఏర్పాటు చేశారు. ఇవి పాదచారులు, సైక్లిస్టులకు నీడనిచ్చే మార్గాలుగా మారడంతో పాటు కాంక్రీట్ వల్ల పెరిగే వేడిని తగ్గించాయి. అధ్యయనాల ప్రకారం ఈ పచ్చని ప్రాంతాల్లో ఉష్ణోగ్రతలు గరిష్టంగా 5 డిగ్రీల సెల్సియస్ వరకు తగ్గాయి.

ఈ ప్రాజెక్ట్ వల్ల గాలి కాలుష్యం తగ్గడం, పక్షులు, సీతాకోకచిలుకలు, ఇతర జీవులకు సహజ ఆవాసాలు ఏర్పడటం వంటి ప్రయోజనాలు కలిగాయి. అలాగే సుమారు 2,600 ల్యాండ్‌స్కేపింగ్ ఉద్యోగాలు కూడా సృష్టించబడ్డాయి. మెడెలిన్ గ్రీన్ కారిడార్స్ మోడల్ ప్రస్తుతం ప్రపంచవ్యాప్తంగా వాతావరణ మార్పులను ఎదుర్కొనే విజయవంతమైన నమూనాగా గుర్తింపు పొందుతోంది.