నిర్దేశిత కక్ష్యలోకి ఎన్‌వీఎస్‌-03 ఉపగ్రహం..

స్వదేశీ నావిగేషన్‌ వ్యవస్థను మరింత బలోపేతం చేసే దిశగా భారత్‌ కీలక ముందడుగు వేసింది. ఇటీవల జీఎస్‌ఎల్‌వీ ఎఫ్‌-18 రాకెట్‌ ద్వారా నింగిలోకి పంపిన ఎన్‌వీఎస్‌-03 నావిగేషన్‌ ఉపగ్రహానికి భారత అంతరిక్ష పరిశోధన సంస్థ (ఇస్రో) విజయవంతంగా కక్ష్య పెంపు విన్యాసాన్ని నిర్వహించింది. దీంతో ఉపగ్రహం నిర్దేశిత జియోసింక్రోనస్‌ కక్ష్యలోకి చేరింది. దేశీయ నావిగేషన్‌ సేవల సామర్థ్యాన్ని పెంచే దిశగా ఈ పరిణామం కీలకంగా మారింది.

అమెరికాకు చెందిన జీపీఎస్‌కు ప్రత్యామ్నాయంగా ఇస్రో నావిక్‌ (NavIC) వ్యవస్థను అభివృద్ధి చేస్తోంది. అయితే గతంలో ప్రయోగించిన కొన్ని ఉపగ్రహాల్లో అణుగడియారాల సాంకేతిక సమస్యలు తలెత్తడం, ఎన్‌వీఎస్‌-02 ప్రయోగం విఫలమవడంతో ఈ వ్యవస్థకు ఆటంకాలు ఎదురయ్యాయి. ఈ నేపథ్యంలో ఎన్‌వీఎస్‌-03 నిర్దేశిత కక్ష్యలోకి చేరడం ప్రాధాన్యం సంతరించుకుంది. నావిక్‌ ద్వారా భారత భూభాగంతోపాటు సరిహద్దులకు అవతల సుమారు 1,500 కిలోమీటర్ల పరిధిలో కచ్చితమైన నావిగేషన్‌ సమాచారాన్ని అందించవచ్చు. రవాణా, విమానయానం, సముద్ర ప్రయాణాలు, వాహనాల పర్యవేక్షణ, అత్యవసర సేవలు వంటి రంగాలకు ఈ వ్యవస్థ ఉపయోగపడనుంది.