చెన్నై హోటల్ బిల్లుల్లో గ్యాస్ ఛార్జీ...వినియోగదారుల ఆగ్రహం

చెన్నై నగరంలో హోటళ్లలో కొత్త సమస్య తలెత్తింది. వాణిజ్య వంట గ్యాస్ కొరత కారణంగా కొన్ని హోటళ్లు వినియోగదారుల బిల్లుల్లో అదనంగా గ్యాస్ ఛార్జీ చేర్చుతున్నట్లు సమాచారం. మధ్యప్రాచ్య ప్రాంతంలో కొనసాగుతున్న ఉద్రిక్త పరిస్థితులు, యుద్ధ ప్రభావం కారణంగా చమురు సరఫరా వ్యవస్థల్లో అంతరాయం ఏర్పడింది. దీంతో గ్యాస్ సరఫరా తగ్గడంతో హోటల్ వ్యాపారులు ఇబ్బందులు ఎదుర్కొంటున్నారు.

నగరంలోని అనేక హోటళ్లు ప్రతి బిల్లుకు అదనంగా పది రూపాయలు గ్యాస్ ఛార్జీగా వసూలు చేస్తున్నట్లు ఆరోపణలు వినిపిస్తున్నాయి. ఇప్పటికే ఆహార ధరలు పెరగడంతో ఇబ్బంది పడుతున్న వినియోగదారులు దీనిపై తీవ్ర అసంతృప్తి వ్యక్తం చేస్తున్నారు. కొన్ని చోట్ల దోస, ఇడ్లీ వంటి ఆహార పదార్థాల ధరలు కూడా గణనీయంగా పెరిగాయి. అయితే హోటల్ యజమానులు మాత్రం గ్యాస్ సిలిండర్ల కొరత వల్లే ఈ పరిస్థితి ఏర్పడిందని చెబుతున్నారు. సాధారణంగా లభించాల్సిన సిలిండర్లు ప్రస్తుతం అక్రమ మార్కెట్‌లో ఐదు వేల నుంచి ఆరు వేల రూపాయల వరకు విక్రయమవుతున్నాయని వారు పేర్కొంటున్నారు.