ఒకప్పుడు కూలీ.. ఇప్పుడు గ్లోబల్ స్టార్.. కాబీ లామ్ సక్సెస్ స్టోరీ ఇదే!

ప్రపంచవ్యాప్తంగా కోట్లాది మంది అభిమానులను సంపాదించిన కంటెంట్ క్రియేటర్ కాబీ లామ్ జీవితం ఎన్నో కష్టాలు, సవాళ్లతో నిండిపోయింది. సెనెగల్‌లో జన్మించిన ఆయన చిన్న వయసులోనే కుటుంబంతో కలిసి ఇటలీకి వలస వెళ్లారు. ఆర్థిక ఇబ్బందులు, పేదరికం, చదువులో వెనుకబాటు ఆయన బాల్యాన్ని ప్రభావితం చేశాయి. డిస్లెక్సియా సమస్య కారణంగా చదవడం, రాయడం కష్టంగా మారినా, తన హాస్యచతురతతో ఇతరులను నవ్వించడం ఆయన ప్రత్యేకతగా నిలిచింది. కుటుంబానికి అండగా ఉండేందుకు కూలీ పనులు, రెస్టారెంట్ ఉద్యోగాలు, ఫ్యాక్టరీలో మెషీన్ ఆపరేటర్‌గా కూడా పనిచేశారు.

కోవిడ్ మహమ్మారి సమయంలో ఉద్యోగం కోల్పోయిన తర్వాత ఆయన జీవితంలో కీలక మలుపు తిరిగింది. స్నేహితుల ప్రోత్సాహంతో సోషల్ మీడియా వీడియోలు చేయడం ప్రారంభించిన కాబీ, మాటలు లేకుండా కేవలం హావభావాలతో సైలెంట్ కామెడీని ప్రజలకు పరిచయం చేశాడు. క్లిష్టమైన లైఫ్ హ్యాక్స్‌పై వ్యంగ్యంగా రూపొందించిన వీడియోలు ప్రపంచవ్యాప్తంగా వైరల్ అయ్యాయి. దీంతో ఆయన అంతర్జాతీయ ఖ్యాతిని సంపాదించడమే కాకుండా ప్రముఖ బ్రాండ్లు, వినోద రంగ సంస్థలతో కలిసి పనిచేసే స్థాయికి చేరుకున్నారు. నేడు యువతకు స్ఫూర్తిగా నిలుస్తున్న కాబీ, పిల్లల విద్య, సంక్షేమం కోసం కూడా తన వంతు కృషి చేస్తున్నారు.