అమెరికా అణు పరిశోధనా కేంద్రంలో అగ్ని ప్రమాదం.. రేడియేషన్ లీక్‌పై ఆందోళన

అమెరికాలోని సౌత్ కరోలినా రాష్ట్రంలో అణు పరిశోధనా కేంద్రంలో అగ్ని ప్రమాదం చోటుచేసుకుంది. యూఎస్ ఇంధన శాఖకు చెందిన సవన్నా రివర్ నేషనల్ లేబొరేటరీలోని ఓ గదిలో బుధవారం సాయంత్రం మంటలు చెలరేగినట్లు అధికారులు వెల్లడించారు. ఈ ఘటనతో రేడియేషన్ లీక్ జరిగి ఉండొచ్చనే ఆందోళనలు వ్యక్తమయ్యాయి. అయితే, సుమారు రెండు గంటల్లోనే మంటలను అదుపులోకి తీసుకొచ్చినట్లు అధికారులు తెలిపారు.

ప్రమాదం జరిగిన భవనం వెలుపలికి రేడియోధార్మిక పదార్థాలు విడుదల కాలేదని, ప్రభావం ప్రయోగశాల ప్రాంగణానికే పరిమితమైందని అధికారులు పేర్కొన్నారు. దీంతో సమీప ప్రాంతాల్లోని ప్రజలకు ఎలాంటి ప్రమాదం లేదని భరోసా ఇచ్చారు. అయినప్పటికీ ముందుజాగ్రత్త చర్యల్లో భాగంగా ప్రయోగశాలలోకి వెళ్లే మార్గాలను మూసివేసి, సమీప ప్రాంతాల్లో రాకపోకలను నిలిపివేశారు. ఈ ఘటన నేపథ్యంలో భద్రతా చర్యలను అమలు చేశారు.