డబ్బుల కోసం బాలిక కాలును మళ్లీ విరగొట్టాడా?

ఉత్తరప్రదేశ్‌లోని ముజఫర్‌నగర్‌లో ఓ ప్రభుత్వ వైద్యుడిపై తీవ్ర ఆరోపణలు వెలువడ్డాయి. 14 ఏళ్ల మానసిక వికలాంగ బాలికకు చికిత్స చేసిన వైద్యుడు, డబ్బుల వివాదం కారణంగా ఆమె కాలికి అమర్చిన ఎముకను మళ్లీ విరగొట్టాడని బాలిక తల్లి రేష్మా ఆరోపించారు. ఈ ఘటన స్థానికంగా తీవ్ర చర్చనీయాంశమైంది.

రేష్మా కథనం ప్రకారం, 45 రోజుల క్రితం తన కుమార్తె కుడికాలి ఎముక విరగడంతో ప్రభుత్వ ఆసుపత్రికి తీసుకెళ్లారు. శస్త్రచికిత్సకు ₹25,000 ఖర్చవుతుందని సిబ్బంది చెప్పగా, తాను భరించలేనని వివరించారు. అనంతరం జిల్లా అధికారుల జోక్యంతో ఉచిత వైద్యం అందించాలని ఆదేశాలు వచ్చినప్పటికీ, ఆసుపత్రి సిబ్బంది ₹8,000 వసూలు చేశారని, మిగిలిన మొత్తాన్ని కూడా చెల్లించాలని ఒత్తిడి తెచ్చారని ఆమె ఆరోపించారు.

శస్త్రచికిత్స అనంతరం పరీక్షల కోసం ఆసుపత్రికి వెళ్లిన సమయంలో వైద్యుడు బాలిక మోకాలిని బలవంతంగా మడిచి, అతికించిన ఎముకను మళ్లీ విరగొట్టాడని రేష్మా పేర్కొన్నారు. అనంతరం బయట తీసిన కిరణ చిత్రంలో ఎముక మళ్లీ విరిగినట్లు తేలిందని తెలిపారు. ఆసుపత్రి అధికారులకు ఫిర్యాదు చేసినా స్పందన రాకపోవడంతో జిల్లా కలెక్టర్‌ను ఆశ్రయించారు. ఈ ఘటనపై ముజఫర్‌నగర్ ప్రధాన వైద్యాధికారి సునీల్ తివాతియా సమగ్ర విచారణ జరిపించి, తప్పు రుజువైతే కఠిన చర్యలు తీసుకుంటామని తెలిపారు.