పరాగ్ అగర్వాల్ ఏఐ స్టార్టప్‌కు భారీ నిధులు..

ట్విట్టర్ మాజీ సీఈఓ పరాగ్ అగర్వాల్‌ను ఎలాన్ మస్క్ 44 బిలియన్ డాలర్లకు సంస్థను కొనుగోలు చేసిన అనంతరం 2022 అక్టోబర్‌లో తొలగించారు. ఆ తర్వాత అగర్వాల్ తిరిగి తన ఇంజినీరింగ్ రంగంపై దృష్టి సారించారు. పరిశోధనలు చేయడం, కొత్త ఆలోచనలను అభివృద్ధి చేయడం, కోడింగ్‌పై పనిచేయడం కొనసాగించారు. 2023లో Parallel Web Systems అనే ఆర్టిఫిషియల్ ఇంటెలిజెన్స్ స్టార్టప్‌ను స్థాపించారు. ఏఐ ఏజెంట్లు ఇంటర్నెట్‌లో సమాచారాన్ని వెతికి, సేకరించేందుకు అవసరమైన సెర్చ్, రీసెర్చ్ సాంకేతిక వ్యవస్థలను ఈ సంస్థ అభివృద్ధి చేస్తోంది.

ఇటీవల ఓ పాడ్‌కాస్ట్ ఇంటర్వ్యూలో అగర్వాల్ ఆసక్తికర విషయాలను వెల్లడించారు. ట్విట్టర్‌లో తీవ్ర పరిణామాలు చోటుచేసుకున్న సమయంలోనూ, తదుపరి చేయాల్సిన పనులపై దృష్టి పెట్టడం వల్ల ప్రశాంతంగా నిద్రపోగలిగానని తెలిపారు. ప్రస్తుతం ఆయన వ్యాపార ప్రయాణం మరో కీలక దశకు చేరుకుంది. 2026 అక్టోబర్‌లో Parallel సంస్థ సిరీస్ బి నిధుల సమీకరణలో 100 మిలియన్ డాలర్లు పొందినట్లు, దీంతో సంస్థ విలువ 2 బిలియన్ డాలర్లకు చేరినట్లు నివేదికలు వెల్లడించాయి.