2026 లో విడుదలకు సిద్ధమవుతున్న OpenAI ఆడియో ఫస్ట్ AI డివైస్

ఆడియో ఆధారిత కృత్రిమ మేధస్సు (AI) టెక్నాలజీపై OpenAI తన దృష్టిని మరింత పెంచుతోంది. ఈ క్రమంలో కొత్తగా అధునాతన ఆడియో జనరేషన్ మోడల్‌ను అభివృద్ధి చేస్తోంది. ఈ పనిని వేగవంతం చేయడానికి ఇంజినీరింగ్‌, ప్రొడక్ట్‌, రీసెర్చ్ విభాగాలకు చెందిన పలుచోట్ల బృందాలను సంస్థ ఏకీకృతం చేసింది. ఈ కొత్త ఆడియో మోడల్ 2026 ప్రారంభంలో విడుదలయ్యే అవకాశం ఉందని, ఇది OpenAI రూపొందిస్తున్న ఆడియో-ఫస్ట్ AI డివైస్‌కు ప్రధాన శక్తిగా పని చేయనుందని సమాచారం. ఈ డివైస్ 2026 చివర్లో మార్కెట్‌లోకి వచ్చే అవకాశముంది.

ఈ కొత్త ఆడియో మోడల్‌లో సహజంగా వినిపించే వాయిస్‌, యూజర్ మధ్యలో మాట కట్ చేసినప్పుడు మెరుగైన స్పందన, అలాగే యూజర్ మాట్లాడుతున్న సమయంలోనే స్పందించగల సామర్థ్యం వంటి ఫీచర్లు ఉండనున్నాయని చెబుతున్నారు. ఇవి సంభాషణను మరింత మానవీయంగా అనిపించేలా చేయనున్నాయి. రాబోయే ఈ డివైస్ స్క్రీన్ లేకుండా ఉండే అవకాశం ఉందని, గతంలో వచ్చిన AI పిన్లు, AI పెండెంట్ల తరహాలో ఉంటుందని తెలుస్తోంది.

అదే సమయంలో OpenAI ప్రస్తుతం వెండర్ ఎంపిక దశలో ఉందని, వియత్నాంలోని ఫాక్స్‌కాన్ ప్లాంట్ ద్వారా తయారీ చేయించే అవకాశాన్ని పరిశీలిస్తున్నట్లు నివేదికలు చెబుతున్నాయి. అంతేకాదు, OpenAI మరో రెండు డివైసులపై కూడా పని చేస్తోందని, వాటిలో ఒకటి AI ఆధారిత పెన్‌గా ఉండొచ్చని సమాచారం. అయితే వాటి పూర్తి వివరాలు ఇంకా వెల్లడించలేదు.