హార్దిక్ పాండ్యా గాయంపై ఆందోళన..వచ్చే ఏడాది ఐపీఎల్‌లోనే రీఎంట్రీ?

భారత క్రికెట్ జట్టు స్టార్ ఆల్‌రౌండర్ హార్దిక్ పాండ్యా గాయంపై ఆందోళన వ్యక్తమవుతోంది. అతడు మళ్లీ మైదానంలోకి రావడానికి మరింత సమయం పట్టే అవకాశం ఉందని వార్తలు వస్తున్నాయి. ఈ ఏడాది ఐపీఎల్‌ చివరి దశలో పాండ్యా వెన్నునొప్పితో ఇబ్బంది పడ్డాడు. ఆ తర్వాత భారత జట్టు తరఫున ఆడేందుకు సిద్ధమవుతున్న సమయంలో తొడ కండరానికి గాయమైంది. ఈ గాయం నుంచి కోలుకుంటున్న క్రమంలో కాలి కింది భాగంలో మరోసారి నొప్పి మొదలైనట్లు సమాచారం. వరుస గాయాల కారణంగా అతడు పలు అంతర్జాతీయ సిరీస్‌లకు దూరమయ్యాడు. ప్రస్తుతం వైద్యుల సూచనల మేరకు విశ్రాంతి తీసుకుంటూ, గాయంపై అదనపు ఒత్తిడి పడకుండా జాగ్రత్తలు తీసుకుంటున్నాడు.

తాజా వార్తల ప్రకారం, హార్దిక్ పాండ్యా వచ్చే ఏడాది ఐపీఎల్‌ వరకు క్రికెట్‌కు దూరంగా ఉండే అవకాశం ఉంది. అయితే, అతడి రీఎంట్రీపై తుది నిర్ణయం కోలుకునే వేగం, వైద్య పరీక్షల ఫలితాలు, ఫిట్‌నెస్‌పై ఆధారపడి ఉంటుంది. 2027 వన్డే ప్రపంచకప్‌కు భారత జట్టు సన్నద్ధమవుతున్న సమయంలో పాండ్యా అందుబాటులో లేకపోవడం జట్టుకు ఇబ్బందికరంగా మారవచ్చు. బ్యాటింగ్‌తో పాటు బౌలింగ్‌లోనూ కీలక పాత్ర పోషించే పాండ్యా జట్టు సమతూకానికి ఎంతో అవసరం. అతడు మరింత కాలం దూరంగా ఉంటే, అతడి స్థానంలో రెండు విభాగాల్లోనూ రాణించగల ఆటగాడిని ఎంపిక చేయడం జట్టు యాజమాన్యానికి సవాలుగా మారనుంది. అయితే, పాండ్యా తిరిగి ఎప్పుడు ఆడతాడనే దానిపై అధికారిక స్పష్టత రావాల్సి ఉంది.