ఆసియా క్రీడలు 2026: షెఫాలి శతకంతో ఫైనల్లోకి భారత్..

ఆసియా క్రీడలు 2026 మహిళల క్రికెట్‌లో డిఫెండింగ్ ఛాంపియన్ భారత్ ఫైనల్లోకి దూసుకెళ్లింది. ఆదివారం జరిగిన సెమీఫైనల్లో బంగ్లాదేశ్‌ను 114 పరుగుల భారీ తేడాతో ఓడించింది. తొలుత బ్యాటింగ్ చేసిన భారత్ 20 ఓవర్లలో 4 వికెట్లకు 195 పరుగులు చేసింది. ఓపెనర్ షెఫాలి వర్మ అద్భుత ఇన్నింగ్స్‌తో 49 బంతుల్లోనే అజేయంగా 100 పరుగులు చేసింది. ఆమె ఖాతాలో మూడు ఫోర్లు, తొమ్మిది సిక్సర్లు ఉన్నాయి. స్మృతి మంధాన 19 బంతుల్లో 37, కెప్టెన్ హర్మన్‌ప్రీత్ కౌర్ 33 బంతుల్లో 40 పరుగులతో రాణించారు. ఇన్నింగ్స్ చివరి బంతికి షెఫాలి తన తొలి అంతర్జాతీయ వైట్‌బాల్ శతకాన్ని పూర్తి చేసింది.

భారీ లక్ష్యాన్ని ఛేదించే క్రమంలో బంగ్లాదేశ్ భారత బౌలర్ల ధాటికి ఏమాత్రం నిలవలేకపోయింది. 15.4 ఓవర్లలో 81 పరుగులకే ఆలౌటైంది. దిలారా అక్తర్ 27 పరుగులతో టాప్ స్కోరర్‌గా నిలిచింది. భారత బౌలర్లలో దీప్తి శర్మ, నందని శర్మ చెరో మూడు వికెట్లు తీయగా.. శ్రీచరణి రెండు వికెట్లు పడగొట్టింది. మరో సెమీఫైనల్లో శ్రీలంక 8 వికెట్ల తేడాతో పాకిస్థాన్‌ను ఓడించి ఫైనల్‌కు చేరుకుంది. దీంతో స్వర్ణ పతకం కోసం భారత్, శ్రీలంక తలపడనున్నాయి. ఇదిలా ఉండగా, బంగ్లాదేశ్‌తో మ్యాచ్‌లో 37 పరుగులు చేసిన స్మృతి మంధాన మహిళల టీ20 అంతర్జాతీయ క్రికెట్‌లో 4,788 పరుగులకు చేరుకుంది. ఈ క్రమంలో సుజీ బేట్స్‌ను అధిగమించి ఈ ఫార్మాట్‌లో అత్యధిక పరుగులు చేసిన బ్యాటర్‌గా నిలిచింది.