టెస్టు క్రికెట్ చరిత్రలో భారత జట్టుకు మరచిపోలేని చీకటి రోజు!

బహుశా 1983 తర్వాత, అది కూడా స్వదేశంలో, భారత జట్టు టెస్టు క్రికెట్‌లో ఇంతటి దయనీయ పరిస్థితిని ఎప్పుడూ చూడలేదు. ఇండియాలో టెస్టు సిరీస్ గెలవడం కాదు, ఒక్క టెస్టు మ్యాచ్ గెలవడానికే ఇబ్బంది పడే జట్లు కూడా ఇప్పుడు వచ్చి తమ చరిత్రలోనే అత్యంత ఘన విజయాలు నమోదు చేస్తున్నాయి. కొన్ని రోజుల క్రితం న్యూజిలాండ్ వచ్చి స్వదేశీ పులి అనిపించుకున్న ఇండియాను 3-0తో మట్టికరిపిస్తే, ఇప్పుడు అదే దారిలో దూసుకొచ్చింది సౌతాఫ్రికా. ఊహించినట్లుగానే భారత బ్యాటర్లు చేతులెత్తేశారు. రెండో టెస్టులో ఘోర ఓటమిని తప్పించుకోవడం కూడా సాధ్యం కాలేదు. ఒకప్పుడు ఇండియాకు “స్వదేశీ పులి” అనే బిరుదు ఉండేది. ఎలాంటి ఆటగాళ్లు ఉన్నా, ఎలాంటి కోచ్‌లు, సెలెక్టర్లు ఉన్నా — కనీసం ఇంటి మైదానాల్లో టీమిండియాను ఎదిరించడం అసాధ్యమే. స్టీవ్ వా సారధ్యంలోని చరిత్రలోనే అత్యంత శక్తివంతమైన ఆస్ట్రేలియా జట్టుకీ ఇండియాలో టెస్టు సిరీస్ గెలవడం సాధ్యపడలేదు.

వరుసగా 16 టెస్టులు గెలిచి ప్రపంచాన్ని వణికించిన ఆ జట్టునే టీమిండియా ఫాలో ఆన్‌కు గురిచేసి నిలువరించింది. భారత స్వదేశ రికార్డులు అప్పట్లో ఇంతటి దుర్భేద్యంగా ఉండేవి. కేవలం రికార్డులే కాదు - ఇండియాలో టెస్టు గెలవడం సౌతాఫ్రికా వంటి జట్టుకు ఒకప్పుడు కలపటమే. డి విలియర్స్, ఆమ్లా వంటి దిగ్గజాలు ఉన్నప్పటికీ ఇక్కడ ఒక్క మ్యాచ్ గెలవడానికి వారు తీవ్రంగా కష్టపడ్డారు. అయితే ఇప్పుడు సౌతాఫ్రికా జట్టులో ఉన్న ఆటగాళ్ల పేర్లు కూడా పెద్దగా తెలిసే స్థాయి కాదు. అయినప్పటికీ టీమిండియా మాత్రం చిత్తయింది. మొదటి టెస్టే కాకుండా, రెండో టెస్టులో ఏకంగా 408 పరుగుల తేడాతో ఘోర పరాభవాన్ని మూటగట్టుకుంది.

భారత బ్యాటర్లు ఏదో త్వరగా ఔటవ్వాలని క్యూలో నిలబడ్డట్టుగా కనిపించారు. ఒక రోజంతా బ్యాటింగ్ చేస్తే కనీసం మ్యాచ్‌ను డ్రా చేసే అవకాశం ఉండగా, లైనప్ పూర్తిగా కుప్పకూలింది. రెండు సెషన్లైనా నిలబడలేకపోవడం మరింత దారుణం. ఐదు వందలకు పైగా ఉన్న లక్ష్యంతో రెండో ఇన్నింగ్స్ ప్రారంభించిన టీమిండియా కేవలం 140 పరుగులకే ఆలౌట్ అయింది. మొత్తంగా అరవై ఓవర్లే ఆడగలిగింది. ఇలా ఏడాది వ్యవధిలో వరుసగా వస్తున్న దారుణ ఓటములు టీమిండియా ప్రతిష్టను తీవ్రంగా దెబ్బతీస్తున్నాయి. ఒకవైపు సెలక్షన్‌లో ఉన్న గందరగోళం, మరోవైపు ఆటగాళ్ల తీరు — రెండూ తీవ్ర విమర్శలకు గురవుతున్నాయి. మ్యాచ్ ఫిక్సింగ్ కాలంలో కూడా ప్రదర్శన ఇంత చెత్తగా ఉండలేదు. IPL వల్ల బీసీసీఐ వేల కోట్లు సంపాదిస్తున్నా, క్రికెట్‌పై భారీగా పెట్టుబడులు పెడుతున్నా, ఇలాంటి దిగజారుడు పరిస్థితి రావడం ఆందోళన కలిగిస్తోంది.