ఓటీటీ, నాన్ థియేట్రికల్ డీల్స్‌పై ‘వారణాసి’ మేకర్స్ అసంతృప్తి?

ఎస్.ఎస్. రాజమౌళి దర్శకత్వంలో మహేశ్ బాబు నటిస్తున్న భారీ చిత్రం ‘వారణాసి’ 2027 ఏప్రిల్ 7న ప్రపంచవ్యాప్తంగా థియేటర్లలో విడుదల కానుంది. షూటింగ్ దాదాపు పూర్తయ్యే దశకు చేరుకోవడంతో చిత్రబృందం ప్రీ-రిలీజ్ బిజినెస్‌పై దృష్టి సారించినట్లు తెలుస్తోంది. అయితే, ఈ సినిమాకు వస్తున్న వ్యాపార ప్రతిపాదనలపై మేకర్స్ పూర్తిగా సంతృప్తిగా లేరని ఫిల్మ్ ఇండస్ట్రీలో ప్రచారం జరుగుతోంది. ముఖ్యంగా ఓటీటీ హక్కుల కోసం వచ్చిన ఆఫర్ తమ అంచనాలకు తగ్గట్టుగా లేదని, ఇతర నాన్ థియేట్రికల్ హక్కుల విషయంలోనూ ఇదే పరిస్థితి ఉన్నట్లు సమాచారం.

భారీ బడ్జెట్‌తో, అత్యంత ప్రతిష్ఠాత్మకంగా తెరకెక్కుతున్న ఈ సినిమా హక్కుల విలువ విషయంలో చిత్రబృందం రాజీ పడేందుకు సిద్ధంగా లేదని తెలుస్తోంది. ఈ ప్రాజెక్ట్‌పై భారీ మొత్తంలో పెట్టుబడి ఉండటంతో, ఏ డీల్‌ను ఖరారు చేసే ముందు ఆచితూచి నిర్ణయం తీసుకోవాలని మేకర్స్ భావిస్తున్నట్లు సమాచారం. ఈ చిత్రంలో ప్రియాంక చోప్రా, పృథ్వీరాజ్ సుకుమారన్, ప్రకాశ్ రాజ్ కీలక పాత్రలు పోషిస్తున్నారు. నిర్మాతల అంచనాలకు తగిన ఆఫర్లు వస్తాయా, బిజినెస్ డీల్స్ ఎప్పుడు ఖరారవుతాయన్నది ఆసక్తికరంగా మారింది.