‘రామాయణ’ రూ.4,000 కోట్ల బడ్జెట్‌పై యశ్ స్పందన.. భారత్ సత్తా ప్రపంచానికి చూపాలి!

దర్శకుడు నితేశ్ తివారీ తెరకెక్కిస్తున్న ప్రతిష్ఠాత్మక చిత్రం ‘రామాయణ’ ప్రస్తుతం భారీ బడ్జెట్ కారణంగా చర్చనీయాంశంగా మారింది. ఈ సినిమాకు సుమారు రూ.4,000 కోట్లు ఖర్చు చేస్తున్నట్లు ప్రచారం జరుగుతోంది. ఇందులో రణ్‌బీర్ కపూర్ రాముడిగా, సాయి పల్లవి సీతగా, యశ్ రావణుడిగా నటిస్తున్నారు. అక్టోబర్ 15న బెంగళూరులో జరిగిన ట్రైలర్ విడుదల కార్యక్రమంలో యశ్ బడ్జెట్‌పై వస్తున్న విమర్శలకు స్పందించారు. అంతర్జాతీయ ప్రేక్షకులకు భారతీయ సినిమా స్థాయిని పరిచయం చేయాలంటే నిర్మాణ వ్యయం, సినిమా స్థాయి గురించి ధైర్యంగా మాట్లాడాలని అభిప్రాయపడ్డారు.

విదేశాల్లో భారతీయ సినిమాలను తక్కువ బడ్జెట్ చిత్రాలుగా పరిచయం చేస్తే వాటికి తగిన గుర్తింపు లభించకపోవచ్చని యశ్ పేర్కొన్నారు. మన దేశంలో రూపొందే సినిమాలను మనమే తక్కువ చేసి చూడకూడదని, భారతీయ సినీ పరిశ్రమ సాధిస్తున్న పురోగతిని ప్రపంచానికి తెలియజేయాలని అన్నారు. ‘రామాయణ’ను కేవలం భారీ బడ్జెట్ చిత్రంగా కాకుండా, భారతీయ సినిమా సాంకేతిక సామర్థ్యాన్ని అంతర్జాతీయ స్థాయిలో ప్రదర్శించే అవకాశంగా చూడాలని అభిప్రాయపడ్డారు. ఈ చిత్రంలో రవి దూబే, రకుల్ ప్రీత్ సింగ్ కీలక పాత్రల్లో నటిస్తుండగా, ఏఆర్ రెహమాన్ సంగీతం అందిస్తున్నారు. రెండు భాగాలుగా రూపొందుతున్న ఈ సినిమా మొదటి భాగం దీపావళికి విడుదల కానున్నట్లు సమాచారం.