‘రామాయణం’లో సీత పాత్రను భక్తితో స్వీకరించా - సాయిపల్లవి

రాబోయే చిత్రం రామాయణంలో సీతాదేవి పాత్రను పోషించడంపై నటి సాయిపల్లవి తన అనుభవాలను పంచుకున్నారు. ఎంతో పవిత్రమైన, గౌరవనీయమైన పాత్ర కావడంతో. తన సాధారణ పాత్రల కంటే భిన్నంగా సీత పాత్రను స్వీకరించినట్లు ఆమె వెల్లడించారు. సాధారణంగా తాను పోషించే ప్రతి పాత్రకు తనదైన శైలిని జోడిస్తానని, తన ఆలోచనలు, అభిప్రాయాలను అందులో పొందుపరుస్తానని సాయిపల్లవి తెలిపారు. అయితే సీతాదేవి పాత్ర విషయంలో మాత్రం తన దృక్పథం పూర్తిగా మారిపోయిందని చెప్పారు. ఆ పాత్రకు తనదైన అర్థాన్ని జోడించడం కంటే.. అంతటి పవిత్రమైన పాత్ర నుంచి తాను ఏమి నేర్చుకోగలను, ఏమి పొందగలను అనే విషయంపైనే దృష్టి పెట్టినట్లు వివరించారు.

అమితాబ్ బచ్చన్ వ్యాఖ్యాతగా వ్యవహరిస్తున్న ప్రముఖ టెలివిజన్ షో కౌన్ బనేగా కరోడ్‌పతిలో పాల్గొన్న సందర్భంగా సాయిపల్లవి ఈ వ్యాఖ్యలు చేశారు. “నేను పోషించే ప్రతి పాత్రకు నా వెర్షన్‌ను జోడించి, నా ఆలోచనలను అందులో పొందుపరుస్తాను. కానీ సీత పాత్రను పోషిస్తున్నప్పుడు, అంతటి పవిత్రమైన పాత్ర నుంచి నేను ఏమి పొందగలను అనే విషయంపైనే ఆలోచించాను. నా బుద్ధిని ఉపయోగించలేదు. ఆమె ఆశీస్సులను స్వీకరించి, సీత పాత్రలోని శక్తిని, గంభీరతను మనసులోకి తీసుకున్నాను” అని ఆమె పేర్కొన్నారు. సాయిపల్లవి మాటలు అమితాబ్ బచ్చన్‌ను ఆకట్టుకున్నట్లు సమాచారం. సీతాదేవి పాత్రపై ఆమెకు ఉన్న భక్తి, గౌరవం ఈ వ్యాఖ్యల్లో స్పష్టంగా కనిపించాయి. ఇతిహాస కథ ఆధారంగా తెరకెక్కుతున్న ఈ చిత్రంలో సీత పాత్రను ఆమె ఎంత బాధ్యతగా స్వీకరించారో ఈ మాటలు తెలియజేస్తున్నాయి.