'రామాయణ'కు ఆస్కార్ రావాల్సిందే- దేవేంద్ర ఫడణవీస్

మహారాష్ట్ర ముఖ్యమంత్రి దేవేంద్ర ఫడణవీస్ దర్శకుడు నితేశ్ తివారీ తెరకెక్కిస్తున్న ప్రతిష్ఠాత్మక చిత్రం 'రామాయణ'పై ప్రశంసల వర్షం కురిపించారు. ప్రైమ్ ఫోకస్ స్టూడియోస్ ప్రారంభోత్సవంలో మాట్లాడుతూ, ఈ చిత్రానికి ఆస్కార్ అవార్డు రాకపోతే అకాడమీ జ్యూరీ నిర్ణయంపైనే తాను నిరాశ చెందుతానని అన్నారు. 'రామాయణ' సాధారణ సినిమా కాదని, తరతరాల పాటు గుర్తుండిపోయే మహత్తర చిత్రంగా నిలుస్తుందని పేర్కొన్నారు. రెండు భాగాలుగా తెరకెక్కుతున్న ఈ చిత్రం భారతీయ సినిమాను ప్రపంచ స్థాయిలో కొత్త శిఖరాలకు తీసుకెళ్తుందని ఆశాభావం వ్యక్తం చేశారు.

గతంలో ప్రధానమంత్రితో కలిసి సినిమా సెట్స్‌ను సందర్శించిన విషయాన్ని గుర్తు చేసిన ఫడణవీస్, అక్కడి నిర్మాణ వైభవం, అత్యాధునిక సాంకేతిక నాణ్యత తనను ఎంతగానో ఆకట్టుకున్నాయని తెలిపారు. భారతీయ సంస్కృతి, పౌరాణిక కథలను ఆధునిక సాంకేతికతతో ప్రపంచ ప్రేక్షకులకు అందించడం గొప్ప ప్రయత్నమని కొనియాడారు. రణ్‌బీర్ కపూర్ ప్రధాన పాత్రలో నటిస్తున్న ఈ చిత్రం తొలి భాగం నవంబర్ 6న విడుదల కానుండగా, రెండో భాగం చిత్రీకరణలో సగానికి పైగా పూర్తైనట్లు చిత్రబృందం వెల్లడించింది.