విజయ్ ఆంటోనీ–శశి కాంబోలో కొత్త సాంగ్ విడుదల

విజయ్ ఆంటోనీ, శశి కాంబినేషన్‌లో తెరకెక్కుతున్న కొత్త చిత్రం ‘వంద దేవుళ్ళు’ నుంచి మెలోడీ సాంగ్ ‘రీంగారా.. రీంగారా’ విడుదలైంది. గతంలో వీరి కాంబినేషన్‌లో వచ్చిన ‘బిచ్చగాడు’ భారీ విజయాన్ని సాధించిన విషయం తెలిసిందే. అదే మ్యాజిక్‌ను మళ్లీ రిపీట్ చేయాలనే లక్ష్యంతో ఈ కొత్త ప్రాజెక్ట్‌ను ప్రేక్షకుల ముందుకు తీసుకొస్తున్నారు. ఫాతిమా విజయ్ ఆంటోనీ సమర్పణలో సర్వంత్ రామ్ క్రియేషన్స్ బ్యానర్‌పై రామంజనేయులు జవ్వాజి ఈ సినిమాను నిర్మిస్తున్నారు.

ఈ పాటలో లిజమోల్ జోస్, అజయ్ ధీషాన్ జంట ఆకట్టుకుంది. భాష్య శ్రీ రాసిన సాహిత్యం ఎంతో వినసొంపుగా ఉండగా, బాలాజీ శ్రీరామ్ అందించిన సంగీతం శ్రావ్యంగా ఉంది. సంతోష్ హరిహరణ్, మానసి జి కణ్ణన్ గాత్రం పాటకు మరింత అందాన్ని తీసుకొచ్చింది. ఇప్పటికే విడుదలైన పోస్టర్లు, గ్లింప్స్, టీజర్‌కు మంచి స్పందన లభించింది.

ఈ సినిమాను సమ్మర్ కానుకగా గ్రాండ్‌గా విడుదల చేయనున్నారు. విజయ్ ఆంటోనీ, స్వాసిక, అజయ్, కావ్య తదితరులు కీలక పాత్రల్లో నటిస్తున్నారు. ఎస్. బి. దర్శన్ కిర్లోష్ కెమెరామెన్‌గా, హరిష్ యువరాజ్ ఎడిటర్‌గా పనిచేశారు. ఈ ప్రాజెక్ట్‌పై ప్రేక్షకుల్లో మంచి అంచనాలు నెలకొన్నాయి.