ఆ మధుర జ్ఞాపకం ఎప్పటికీ గుర్తుండిపోతుంది – సందీప్ కిషన్

దళపతి విజయ్ తనయుడు జాసన్ సంజయ్ దర్శకుడిగా పరిచయం అవుతున్న హై-వోల్టేజ్ యాక్షన్ థ్రిల్లర్ ‘సిగ్మా’. ఇందులో సందీప్ కిషన్, ఫరియా అబ్దుల్లా జంటగా నటిస్తున్నారు. షూటింగ్ పూర్తి చేసుకున్న ఈ సినిమా 2026 అక్టోబర్ 2న ప్రేక్షకుల ముందుకు రానుంది. జాసన్ సంజయ్ తొలి చిత్రంగా రూపొందుతున్న ‘సిగ్మా’పై ఇప్పటికే ప్రేక్షకుల్లో ఆసక్తి నెలకొంది.

తాజాగా ఓ ఈవెంట్‌లో పాల్గొన్న సందీప్ కిషన్ ఈ సినిమా తన వరకు ఎలా వచ్చిందనే విషయంపై ఆసక్తికరమైన విషయాలను పంచుకున్నారు. ‘లియో’ సినిమా పూజా కార్యక్రమానికి వెళ్లిన సమయంలో లోకేష్ కనగరాజ్ తనను సెట్‌కు ఆహ్వానించారని తెలిపారు. అక్కడ విజయ్ తనను పిలిచి ‘మానగరం’తో పాటు తన ఇతర సినిమాలు చూశానని, తన నటన నచ్చిందని చెప్పినట్లు సందీప్ గుర్తుచేసుకున్నారు. అంతేకాకుండా తన కుమారుడు జాసన్ సంజయ్‌కు సందీప్ అంటే చాలా ఇష్టమని విజయ్ చెప్పినట్లు తెలిపారు. అయితే ఈ విషయాన్ని బయట చెబితే ట్రోలింగ్ ఎదురయ్యే అవకాశం ఉందని లోకేష్ అప్పట్లో హెచ్చరించడంతో తాను మౌనంగా ఉన్నానని సందీప్ చెప్పారు. ఇప్పుడు ఆ మధురమైన జ్ఞాపకాన్ని అభిమానులతో పంచుకోవడం ఆనందంగా ఉందని తెలిపారు.