బిగ్ బీ డెడికేషన్‌కు హ్యాట్సాఫ్!

83 ఏళ్ల వయసులోనూ బాలీవుడ్ మెగాస్టార్ అమితాబ్ బచ్చన్ తన వృత్తిపట్ల చూపిస్తున్న అంకితభావం మరోసారి అందరినీ ఆకట్టుకుంది. ‘కౌన్ బనేగా కరోడ్‌పతి 18’ చిత్రీకరణ కోసం ఆయన ఏకంగా 24 గంటల పాటు నిరవధికంగా పనిచేసిన విషయాన్ని స్వయంగా తన అధికారిక బ్లాగ్‌లో వెల్లడించారు. ఉదయం 7 గంటలకు ప్రారంభమైన షూటింగ్ మరుసటి రోజు అదే సమయం వరకు కొనసాగిందని ఆయన పేర్కొన్నారు. కార్యక్రమం ప్రసారానికి సమయం దగ్గరపడుతున్న నేపథ్యంలో నిర్ణయించిన గడువులో పనులు పూర్తి చేయాల్సిన అవసరం ఉండటంతో ఈ సుదీర్ఘ షిఫ్ట్‌లో పాల్గొన్నట్లు వివరించారు.

ఆగస్టు 10 నుంచి ‘కౌన్ బనేగా కరోడ్‌పతి 18’ ప్రసారం ప్రారంభం కానుండటంతో ఆలస్యం జరగకుండా చూసుకోవాలనే ఉద్దేశంతో ఈ నిర్ణయం తీసుకున్నానని అమితాబ్ తెలిపారు. తాను అందుబాటులో లేకపోతే తన స్థానంలో మరొకరిని తీసుకునే అవకాశం ఉంటుందని సరదాగా వ్యాఖ్యానించారు. 2000లో ప్రారంభమైన ఈ కార్యక్రమానికి మూడో సీజన్ మినహా దాదాపు అన్ని సీజన్లలోనూ ఆయన హోస్ట్‌గా కొనసాగుతున్నారు. ఆరోగ్యపరమైన సవాళ్లు ఉన్నప్పటికీ ఇప్పటికీ అదే ఉత్సాహంతో పనిచేస్తున్న అమితాబ్ బచ్చన్‌పై అభిమానులతో పాటు సినీ ప్రముఖులు ప్రశంసలు కురిపిస్తున్నారు. ఆయన నిబద్ధత యువతకు స్ఫూర్తిగా నిలుస్తోందని సోషల్ మీడియాలో అభిప్రాయాలు వ్యక్తమవుతున్నాయి.