శివాజీ కామెంట్స్‌పై హర్షవర్ధన్ స్పందన: దుస్తులే స్వేచ్ఛ కాదు

స్వేచ్ఛలో దుస్తులు ఒక భాగమే కానీ, దుస్తులే స్వేచ్ఛ కాదని నటుడు హర్షవర్ధన్ స్పష్టం చేశారు. ఇటీవల ఇండస్ట్రీలో హాట్ టాపిక్‌గా మారిన శివాజీ వ్యాఖ్యలపై ఆయన ఒక ఇంటర్వ్యూలో తన అభిప్రాయాలను వెల్లడించారు. హర్షవర్ధన్ చేసిన వ్యాఖ్యలు ప్రస్తుతం సోషల్ మీడియాలో వైరల్‌గా మారాయి. సున్నితమైన అంశాన్ని సమతుల్యంగా వివరించారని నెటిజన్లు ఆయనకు మద్దతు తెలుపుతున్నారు. ఈ సందర్భంగా హర్షవర్ధన్ మాట్లాడుతూ, “దొంగల మనసు మార్చే ప్రయత్నం చేయడం కన్నా, మన ఇంటికి తాళం వేసుకోవడం ఉత్తమం. అది నా చేతిలో ఉన్న పని. నా ఇంట్లో ఉన్నవాళ్లకు జాగ్రత్తగా ఉండాలని చెప్పడం నాకు సాధ్యం. కానీ, దొంగలతో ‘ఆలోచించండి, నేను లేని సమయంలో ఒంటరిగా ఉన్నవారిపై దాడి చేయకండి’ అని చెప్పడం కష్టం” అన్నారు.

గత కొన్ని రోజులుగా జరుగుతున్న చర్చలను గమనిస్తే ఒక విషయం స్పష్టంగా అర్థమవుతుందని చెప్పారు. రెండు వేర్వేరు అంశాలను ఎప్పుడూ కలపకూడదని, స్వేచ్ఛ గురించి మాట్లాడితే దానిపైనే ఫోకస్ చేయాలని, దుస్తుల గురించి మాట్లాడితే వాటి గురించే మాట్లాడాలని సూచించారు. మంచి ఉద్దేశంతో చెప్పాలనుకున్నా, మాట్లాడే తీరు సరిగా లేకపోతే శివాజీ, అనసూయల మాదిరిగా వివాదాల్లో చిక్కుకునే పరిస్థితి వస్తుందని అన్నారు. ఈ సందర్భంలో శివాజీ మాట్లాడిన విధానం మాత్రమే తప్పుగా మారిందని హర్షవర్ధన్ అభిప్రాయపడ్డారు.

అలాగే, “స్వేచ్ఛకు అనేక రూపాలు ఉన్నాయి. చదువు, సంబంధాలు, మనకు నచ్చిన ఆహారం తినడం, మనం వెళ్లాలనుకున్న ప్రదేశాలకు వెళ్లడం ఇవన్నీ స్వేచ్ఛలో భాగమే. మనకు నచ్చినట్లు దుస్తులు వేసుకోవడమూ అందులో ఒక అంశమే. అయితే కేవలం మోడ్రన్ దుస్తులు ధరించడమే స్వేచ్ఛ అని భావించడం సరికాదు. దుస్తులపై మాట్లాడేటప్పుడు స్వేచ్ఛ అనే పదాన్ని జాగ్రత్తగా ఉపయోగించాలి. మనం ఉన్న ప్రదేశం, పరిస్థితులను బట్టి డ్రెస్సింగ్ కూడా మారుతుంటుంది” అని హర్షవర్ధన్ తెలిపారు.