జయప్రద వారసుడి సినీ అరంగేట్రం

సీనియర్ నటి జయప్రద వారసుడు సామ్రాట్ సినీ అరంగేట్రానికి సిద్ధమవుతున్నారు. భారతీయ చలనచిత్ర పరిశ్రమలో ప్రత్యేక గుర్తింపు పొందిన జయప్రద సోదరుడి కుమారుడు సామ్రాట్ త్వరలో వెండితెరకు పరిచయం కానున్నారు. కొంతకాలంగా సాగుతున్న ప్రచారానికి తెరపడుతూ, ప్రముఖ నిర్మాణ సంస్థ ఆయనను టాలీవుడ్‌కు గ్రాండ్‌గా పరిచయం చేయడానికి సిద్ధమైంది. ఈ సినిమా భారీ బడ్జెట్‌తో కూడిన కమర్షియల్ ఎంటర్‌టైనర్‌గా రూపొందుతోంది.

సినిమాల్లోకి అడుగుపెట్టే ముందు సామ్రాట్ నటన, డ్యాన్స్, యాక్షన్ రంగాల్లో ప్రత్యేక శిక్షణ పొందినట్లు సమాచారం. ఈ చిత్రాన్ని పాన్-ఇండియా స్థాయిలో తీసుకెళ్లాలని లక్ష్యంగా పెట్టుకుని జయప్రద స్వయంగా ప్రతి అంశంపై దృష్టి సారిస్తున్నారు. సామ్రాట్‌కు జోడిగా టాప్ హీరోయిన్‌ను తీసుకోవాలని భావిస్తూ, ఇప్పటికే కొంతమంది అగ్ర కథానాయికలతో చర్చలు జరిపినట్లు సమాచారం. ఈ ప్రతిష్ఠాత్మక ప్రాజెక్టుకు సంబంధించిన అధికారిక ప్రకటన త్వరలో వెలువడనుండగా, సామ్రాట్ వెండితెరపై ఎలాంటి ముద్ర వేస్తారోనని అభిమానులు ఆసక్తిగా ఎదురుచూస్తున్నారు.