‘తెల్లపోరి’ పాటతో దీవానకు పెరిగిన క్రేజ్

వన్ సైడ్ ప్రేమకథ నేపథ్యంలో తెరకెక్కుతున్న ‘దీవాన’ చిత్రం యూత్ ప్రేక్షకుల్లో మంచి ఆసక్తిని రేకెత్తిస్తోంది. ఇప్పటికే విడుదలైన టీజర్, తొలి గీతానికి మంచి స్పందన లభించగా, తాజాగా ‘తెల్లపోరి’ అనే టీజింగ్ గీతాన్ని చిత్ర బృందం విడుదల చేసింది. ఈ పాటకు ‘ఈ ఏడాది క్రింజ్ గీతం’ అనే ప్రత్యేక వ్యాఖ్యను జోడించడం ఆసక్తిని పెంచుతోంది. సంగీత దర్శకుడు ఈశ్వర్ చంద్ స్వరపరిచి, సాహిత్యం అందించి స్వయంగా ఆలపించిన ఈ గీతం సరదాగా సాగుతూ ఆకట్టుకుంటోంది.

పాటలోని వినోదాత్మక పదాలు, ప్రత్యేక నృత్య రూపకల్పన, విభిన్న ప్రదేశాల్లో చేసిన చిత్రీకరణ ఈ గీతానికి ప్రధాన ఆకర్షణగా నిలుస్తున్నాయి. అర్హ మీడియా, వీ స్టూడియోస్ పతాకాలపై వాసుదేవ్ కొప్పినేని, శ్రీదేవి కార్యంపూడి ఈ చిత్రాన్ని నిర్మిస్తున్నారు. శ్రీకాంత్ సంగిశెట్టి దర్శకత్వం వహిస్తున్న ఈ చిత్రంలో హర్షిత్ రెడ్డి హీరోగా నటిస్తుండగా, స్మేహ మణిమేగలై కథానాయికగా పరిచయం అవుతున్నారు. ఈ సినిమా జూన్ 19న ప్రపంచవ్యాప్తంగా విడుదల కానుంది.