ఛాంపియన్ మూవీ పాటల కు అనూహ్య స్పందన

సినిమా విడుదలకు ముందే పాటలు సూపర్‌హిట్ అయితే, ఆ సినిమాపై ఆసక్తి మరింతగా పెరుగుతుంది. ఇదే విషయాన్ని ప్రస్తుతం ‘ఛాంపియన్’ సినిమా నిరూపిస్తోంది. స్వప్న సినిమా, ఆనంది ఆర్ట్ క్రియేషన్స్, కాన్సెప్ట్ ఫిలిమ్స్ సంయుక్తంగా నిర్మిస్తున్న ఈ సినిమాను జీ స్టూడియోస్ సమర్పిస్తోంది. దర్శకుడు  ప్రదీప్ అద్వైతం తెరకెక్కిస్తున్న ఈ సినిమా ఇప్పటికే సంగీతం ద్వారానే ప్రేక్షకుల్లో మంచి బజ్‌ సృష్టించింది.

మిక్కీ జె.మేయర్‌ అందించిన సంగీతం ఈ సినిమాకి పెద్ద ప్లస్‌గా మారింది. తొలి సాంగ్ ‘గిరా గిరా’ విడుదలైన వెంటనే ప్రేక్షకులను ఆకట్టుకుని, ఇటీవల కాలంలో వచ్చిన అత్యంత పెద్ద హిట్స్‌లో ఒకటిగా నిలిచింది. అందమైన ట్యూన్, ఆకట్టుకునే లిరిక్స్, కలర్‌ఫుల్ విజువల్స్ ఈ పాటను ప్రేక్షకుల ఫేవరెట్‌గా మార్చాయి.

తర్వాత విడుదలైన రెండవ పాట ‘సల్లగుండాలే’ కూడా భారీ స్పందన అందుకుంది. పెళ్లి థీమ్‌తో సాగే ఈ సాంగ్ ఆనందం, భావోద్వేగం రెండింటినీ సమపాళ్లలో మిళితం చేస్తూ, వేడుకలలో తప్పక వినిపించే పాటగా మారబోతోందని అభిమానులు చెబుతున్నారు. ట్రైలర్ కూడా ఇదే స్థాయి ఉత్సాహాన్ని కొనసాగిస్తే, 'ఛాంపియన్' బాక్సాఫీస్ వద్ద ఘనమైన ప్రారంభానికి రంగం సిద్ధం చేసుకునే అవకాశం ఉంది.