‘అనగనగా ఒక రాజు’ దర్శకుడు ఎక్కడ?

నవీన్ పొలిశెట్టి చాలా సంవత్సరాల క్రితం అనగనగా ఒక రాజు సినిమాను ప్రకటించారు. ఈ సినిమా, ఆయన మిస్ శెట్టి మిస్టర్ పొలిశెట్టి మొదలుపెట్టకముందే అనౌన్స్ అయింది. అప్పట్లో మ్యాడ్ సినిమాకు దర్శకత్వం వహించిన కళ్యాణ్ శంకర్‌ను దర్శకుడిగా అనుకున్నారు. కానీ కొన్ని కారణాల వల్ల సినిమా నిలిపివేయబడింది. తరువాత నవీన్ మిస్ శెట్టి మిస్టర్ పొలిశెట్టి చేశాడు, అది పెద్ద హిట్ అయింది. అనగనగా ఒక రాజు ఇక ముందుకు రాదు మరియు నవీన్ ఇతర సినిమాలపై పని చేస్తాడని, అందరూ అనుకున్నారు. 

కానీ అందరికీ షాకిస్తూ నవీన్ ఈ సినిమాను మళ్లీ ప్రారంభించాడు. ఈసారి ‘మారి’ అనే కొత్త వ్యక్తి దర్శకుడిగా చేరాడు. సినిమా కొన్ని నెలల క్రితం పూర్తి అయింది మరియు ఈ సంక్రాంతికి ప్రేక్షకుల ముందుకు రానుంది. ఎప్పట్లాగే తనదైన శైలిలో ప్రమోషన్లు చేస్తూ సినిమాను ఆడియన్స్‌కు చేరువ చేసే ప్రయత్నం చేస్తున్నాడు నవీన్. సంక్రాంతి చిత్రాల్లో దీనంత ప్రమోషన్లు మరే సినిమాకూ లేకపోవడం విశేషం. నవీన్ అన్నీ తానై వ్యవహరిస్తున్నాడు.

ఐతే ‘అనగనగా ఒక రాజు’ ప్రమోషన్లలో ఎక్కడా దర్శకుడు మారి కనిపించడం లేదు. అంతే కాక నవీన్ దర్శకుడి ప్రస్తావన కూడా తేవట్లేదు. మరోవైపు నిర్మాత నాగవంశీ ఈ సినిమా ప్రమోషన్లలో భాగంగా ఇంటర్వ్యూలిస్తుండగా.. అతనూ దర్శకుడి ప్రస్తావన తేవట్లేదు. ఈ సినిమాకు సంబంధించి మొత్తం క్రెడిట్‌ నవీన్‌కే ఇస్తున్నాడు. నవీన్ సొంతంగా రైటింగ్ టీంను పెట్టుకుని అదిరిపోయే లెవెల్లో స్క్రిప్టు రెడీ చేశాడని.. సినిమాలో కామెడీ సీన్లు ఇరగదీశాడని.. క్లైమాక్స్ కూడా చాలా బాగా చేశాడని అంటున్నాడు. అంతే తప్ప దర్శకుడి గురించి మాట్లాడట్లేదు. ఈ సినిమాకు నవీన్ ఘోస్ట్ డైరెక్షన్ చేశాడనే మాట ఇండస్ట్రీలో వినిపిస్తోంది. పేరుకు ఒక దర్శకుడిని పెట్టుకుని అంతా నవీనే నడిపించాడని.. అందుకే డైరెక్టర్ బయటికి రావట్లేదని.. తన గురించి హీరో, నిర్మాత కూడా ఎక్కడా మాట్లాడట్లేదని అంటున్నారు. మరి ఈ సినిమా ప్రి రిలీజ్ ఈవెంట్లో అయినా దర్శకుడు కనిపిస్తాడా.. సినిమా గురించి మాట్లాడతాడా.. తనకు టీం క్రెడిట్ ఇస్తుందా.. అన్నది చూడాలి.