రాజమౌళి–మహేష్ బాబు మూవీ టైటిల్ “సంచారి”నా? ఫ్యాన్స్‌లో ఊహాగానాలు హీట్!

‘బాహుబలి’తో దేశాన్ని కుదిపేసి, ‘ఆర్ఆర్ఆర్’తో ప్రపంచస్థాయిలో రికార్డులు సృష్టించిన దర్శకధీరుడు ఎస్‌.ఎస్‌. రాజమౌళి, ఇప్పుడు మహేష్ బాబుతో కలిసి తన తదుపరి భారీ చిత్రాన్ని తెరకెక్కిస్తున్నాడు. ఈ సినిమా టైటిల్‌పై నెలలుగా కొనసాగుతున్న సస్పెన్స్‌కి చివరికి తెరపడబోతోంది.

నవంబర్ 15న రామోజీ ఫిలిం సిటీలో భారీ ఈవెంట్ నిర్వహించబడుతోంది. ఇందులో సినిమా టైటిల్, ఫస్ట్ లుక్ గ్లింప్స్‌ను విడుదల చేయబోతున్నారు. ఏర్పాట్లు పెద్ద స్థాయిలో జరుగుతున్నాయి.

ఇంతకుముందు ఈ సినిమాకు ‘వారణాసి’ అనే టైటిల్ ఫిక్స్ అయ్యిందని ప్రచారం జరిగింది. కానీ అదే పేరుతో మరో చిన్న సినిమా ఇటీవల ప్రకటించడంతో, రాజమౌళి ఆ టైటిల్ వదిలేశారా? లేక కొత్తదానిని తీసుకున్నారా? అన్న చర్చ మొదలైంది.

ఇప్పుడు మాత్రం కొత్త పేరు ‘సంచారి’ తెరపైకి వచ్చింది. ఇటీవల విడుదలైన మొదటి పాటను శ్రుతి హాసన్ పాడడం విశేషం. ఆమె గాత్రం, లిరిక్స్, లిరికల్ వీడియో అన్నీ ఫ్యాన్స్‌లో భారీ క్రేజ్ క్రియేట్ చేశాయి.

పాటలో వినిపించిన “సంచారి.. సంహారి..” లైన్స్ చూసి, ఈ టైటిల్‌కే ఫిక్స్ అయ్యారేమో అని అభిమానులు చర్చించుకుంటున్నారు. సినిమా కథలో హీరో ప్రపంచవ్యాప్తంగా ప్రయాణించే వ్యక్తిగా ఉంటాడని, ఆఫ్రికా వరకూ వెళ్తాడని సమాచారం. అందుకే “సంచారి” (ప్రయాణికుడు) అనే టైటిల్ సరిపోతుందన్న అభిప్రాయం బలపడుతోంది.

మరి ఈ ఊహాగానాలు నిజమవుతాయా, లేదా అనేది శనివారం అధికారిక టైటిల్ రివీల్ తర్వాత తెలుస్తుంది.