టాలీవుడ్ లో టాప్ రెమ్యూనరేషన్ వాళ్ళకే ?

గత కొన్నేళ్లలో తెలుగు సినిమా స్థాయి ప్రపంచవ్యాప్తంగా పెరిగింది. ఒకప్పుడు ప్రాంతీయంగా ఉన్న టాలీవుడ్ ఇప్పుడు పాన్-ఇండియా మార్కెట్‌లో కూడా పెద్ద స్థానం సంపాదించింది. భారీ బడ్జెట్ సినిమాలు, ప్రపంచవ్యాప్తంగా వసూళ్లు, అంతర్జాతీయ మార్కెట్ విస్తరణతో తెలుగు హీరోలకు, హీరోయిన్లకు మంచి డిమాండ్ ఏర్పడింది. ముఖ్యంగా అల్లు అర్జున్, రష్మిక మందన్న నటించిన 'పుష్ప: ది రైజ్', అలాగే 'బాహుబలి', 'ఆర్‌ఆర్‌ఆర్' వంటి సినిమాలు ప్రపంచవ్యాప్తంగా భారీ విజయాలు సాధించడంతో టాలీవుడ్‌కు అంతర్జాతీయ గుర్తింపు వచ్చింది. ఈ విజయాల ప్రభావం స్టార్‌ల రెమ్యునరేషన్‌లపై కూడా కనిపిస్తోంది.

ప్రస్తుతం టాలీవుడ్‌లో అత్యధిక పారితోషికం తీసుకుంటున్న హీరోగా అల్లు అర్జున్ ముందున్నారు. 'పుష్ప 2' భారీ వసూళ్లు సాధించడంతో ఆయన మార్కెట్ విలువ మరింత పెరిగింది. ఇండస్ట్రీ వర్గాల సమాచారం ప్రకారం ఆయన ఒక్కో సినిమాకు సుమారు రూ.200 కోట్ల నుంచి రూ.300 కోట్ల వరకు పారితోషికం తీసుకుంటున్నారని చెబుతున్నారు. పుష్ప 2 సినిమా కోసం సాధారణ రెమ్యునరేషన్ తీసుకోకుండా లాభాల్లో వాటా తీసుకున్నట్లు వార్తలు ఉన్నాయి. ఈ సినిమా ప్రపంచవ్యాప్తంగా రూ.1800 కోట్లకు పైగా వసూళ్లు సాధించడంతో ఆయనకు సుమారు రూ.270 కోట్ల వరకు ఆదాయం వచ్చిందని అంచనా. ఇక దర్శకుడు అట్లీ తెరకెక్కిస్తున్న ‘AA22XA6’ సినిమాలో కూడా ఆయన భారీ పారితోషికంతో పాటు లాభాల్లో వాటా తీసుకోబోతున్నట్లు సమాచారం.

హీరోయిన్లలో అత్యధిక పారితోషికం తీసుకుంటున్న నటి రష్మిక మందన్నగా రిపోర్ట్స్ చెబుతున్నాయి. టాలీవుడ్ నుంచి బాలీవుడ్ వరకు వరుస విజయాలతో ఆమెకు భారీ క్రేజ్ వచ్చింది. ముఖ్యంగా యానిమల్, పుష్ప 2 వంటి సినిమాల విజయంతో దేశవ్యాప్తంగా మంచి ఫ్యాన్ ఫాలోయింగ్ ఏర్పడింది. ప్రస్తుతం ఆమె ఒక్కో సినిమాకు రూ.10 కోట్ల నుంచి రూ.13 కోట్ల వరకు పారితోషికం తీసుకుంటున్నారని సమాచారం. చిన్న సినిమాల కోసం రూ.4 కోట్ల నుంచి రూ.8 కోట్ల వరకు ఫీజు ఉండవచ్చని ఇండస్ట్రీ వర్గాలు చెబుతున్నాయి. సినిమాలతో పాటు బ్రాండ్ ప్రమోషన్లు, ప్రకటనలు, డిజిటల్ హక్కులు, ఓటీటీ ఒప్పందాల ద్వారా కూడా ఆమె భారీ ఆదాయం పొందుతోంది. మొత్తంగా చూస్తే టాలీవుడ్‌లో ప్రస్తుతం అత్యధిక పారితోషికం తీసుకునే హీరోగా అల్లు అర్జున్, హీరోయిన్‌గా రష్మిక మందన్న ముందంజలో ఉన్నట్లు తెలుస్తోంది.